Díaz amosóse arguyosa del llabor realizáu nos postreros cuatro años y demandó respetu a la institución na próxima llexislatura
Ana Isabel Díaz va repitir como candidata a l'alcaldía de Riosa coles mires de volver gobernar el conceyu con trabayu y esfuerzu los mesmos que caracterizaron los postreros cuatro años al frente del conceyu mineru. Pa los próximos cuatro años, Díaz adelantró que va cuntar con un equipu que aúna la veteranía –cuntando coles persones que siempres sofitaron a IX- y los mozos qu'empiecen, tamién con una clara voluntá de trabayu. Tomás Esolá va ser nesta llexislatura'l númberu dos en Riosa, una persona “con ganes d'encarar un retu importante” y bien queríu nel conceyu, como aseguró l'actual alcaldesa.
Diaz, que s'amosó arguyosa del llabor realizáu polos compañeru de la organización nos postreros cuatro años, llamentó, sicasí, la poca collaboración de la oposición y l'ambiente de crispadura qu'estos postreros treslladaron a la corporación. “IX na oposición siempres amosó una postura de respetu pola institución y a los grupos políticos y espero que, si volvemos ganar como asina deseyamos, esi respetu vuelva a la oposición porque nos últimos años rellumó pola so ausencia”, esplicó na see d'IX de Riosa. La oposición d'IX siempres foi de respetu y sofitu y “agora mesmu esiste una crispadura que se tresllada a los vecinos” y queremos, dixo l'alcaldesa, que sía como quier la posición de cada unu sía de respetu.
El diputáu d'IX y número dos na llista autonómica, Ovidio Zapico, aseguró que magar la crispadura “totalmente irresponsable y condenable” a la que dalgunos sometieron a l'alcaldesa y la convivencia y normalidá de la mesma nel conceyu, los vecinos volverán depositar l'enfotu n'IX para poder siguir el bon trabayu realizáu por que Riosa avance. “Nun conceyu mineru, fuertemente castigáu pola desindustrialización, la despoblación y la falta de perspectives para los mozos ye bon llugar para reivindicar unes Cuenques y una Asturies onde la xente pueda vivir y trabayar”, esplicó'l diputáu d'IX. Dotar a los territorios mineros de posibilidaes reales de siguir esistiendo va ser unu de les exes de la campaña d'IX, avanzó'l tamién candidatu autonómicu.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies