Menu

La presencia d'IX garantizaría un executivu que defenda los intereses de la comunidá

Ángela Vallina esplicó a los asturianos que nun se dexen engañar con llamamientos al mieu a la derecha y a les apelaciones al votu útil. Asturies pola Izquierda, la coalición formada por IX y IAS, ye'l verdaderu votu útil por que n’Asturies esista un Gobiernu de la izquierda “de verdá”, dixo. Nun hai peligru na comunidá autónoma d'un gobiernu de dereches, pero sí d'un Gobiernu socialista qu’al día dempués de les elecciones xire a la derecha, afirmó la candidata a la presidencia del Principáu d'Asturies pola Izquierda. La presencia d'IX y IAS n'ese executivu garantizaría un gobiernu que “sala del estáu funcionarial actual, ensin lideralgu” y que dexe de ser “sumisu” a los intereses del so partíu nel Gobiernu nacional, como asocedió mientres tolos años nos que'l PSOE gobernó, que “nun defendió los intereses d'Asturies”.

La candidata d'Asturies pola Izquierda compareció en rueda de prensa al pie d’Alejandro Suárez, Secretariu d'Organización d'IX d'Asturies, pa presentar el programa electoral, con “ilusión y optimismu”, porque Asturies tien capacidá pa enfrentar el futuru ya IX sabi cómo faelo, aprovechando tolos recursos colos que cunta la comunidá, los nacionales y los de la Unión Europea. Nesti sentíu, aseguró que nel momentu actual, cola amenaza de la descarbonización express, ensin fondos de la Unión Europea bien aprovechaos, “Asturies afogaríase”.

El programa d'Asturies pola Izquierda recueye los asuntos nos que, como siempres IX incide nes sos política, contién un bloque de l'Asturies Social, qu'inclúi l'apueste polos servicios públicos básicos y les prestaciones sociales, la educación como derechu fundamental, la Universidá como motor de desenvolvimientu, la meyora de la educación, polítiques feministes, d'igualdá, … un segundu bloque qu'enceta l'Asturies Trabayadora Innovadora, con propuestes pa la investigación y la innovación, pa la fortaleza que representa la vocación industrial, minera y enerxética d'Asturies, pal pequenu comerciu, en defensa de l'agricultura y la ganadería como fonte de riqueza, pa convertir los recursos natural y turísticu en puntales de la economía… Un tercer bloque denomináu Asturies pa Vivir, onde se fala de demografía, de vivienda, infraestructures, de movilidá, comunicaciones… y otru cola Asturies Democrática, Comprometida y Exemplar, onde s'enceta la necesidá d'una mayor democracia y más tranparencia, la defensa del empléu públicu, la meyora de l'alministración de xusticia, la implementación de clauses sociales, ambientales y de xéneru na contratación pública, la necesidá d'una Asturies laica, l'apueste pola cultura o'l deporte… Son, en definitiva como esplicó la candidata, les polítiques d'izquierdes p’ameyorar la calidá de vida de la ciudadanía.

D'últimes Vallina tamién alvirtió que ta cansada de que los políticos del PSOE argumenten que les decisiones tomar n'Europa cuando nun-yos interesa, como ye'l casu de la mayor apertura de la Unión Europea al aceru ensin aranceles, y recordó que quien gobierna Europa ye'l Conseyu d'Europa, formáu polos xefes d'estáu de tolos países, incluyíu'l d'España. “Tienen De dexar d'engañar a la xente y qu'el nuesu Presidente vaya a Europa y defenda los nuesos intereses”, clamó. De la mesma, señaló que tol mundu sabe qu'España tien la enerxía más cara d'Europa, non solo para les empreses, sinón para los ciudadanos, con un sector eléctricu privatizáu al 100%. “Si esto ye lo que defende Barbón ye'l zarru d'Asturies, por enforma qu'el so partíu sía'l que gobierne”, concluyó.

La candidata d'IX tamién llamentó “la vergüenza” que representa qu'Arcelor enterarase con dos díes d'antelación de la decisión de la UE de xubir un 5% el cupu d'aceros ensin arancel porque, al so xuiciu, demuestra que los lobbys conocen primero que la ciudadanía estes decisiones y anuncien los sos retayos de producción de forma previa. “Demuéstrase que quien gobiernen na Unión Europa son los grupos de presión”, enfatizó.

Pela so parte, Alejandro Suárez aseguró qu'IX apuesta por liderar Asturies, que s'atopa con un lideralgu débil, gris y sometíu a los intereses del Gobiernu nacional que nun considera al millón d'habitantes d'esta comunidá como una prioridá.