Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

01/10/2019

IX va sumase a la marcha pol Soterramientu de Llangréu y denuncia l'abandonu de les infraestructures ferroviaries

La Plataforma pa la eliminación de la barrera ferroviaria nesi conceyu convoca a una marcha ente Llaviana y La Felguera pa esixir el fin de la obra y meyores indispensables pa garantizar el futuru de la llínea

Ovidio Zapico reclama la convocatoria yá n'ochobre de l'Alianza Político y Social poles Infraestrucutres, como comprometió'l Conseyeru pal mes d'ochobre

Izquierda Xunida reclamó güei respuestes pa revertir el deterioru de les cercaníes n'Asturies y de les llínees medies tantu pa escontra l'Oriente como pa escontra l'Occidente de la Comunidá Autónoma. El diputáu y voceru d'infraestructures de la formación, Ovidio Zapico, denunció esta mañana'l paralís y abandonu de la rede ferroviaria: “tamos perdiendo'l pulsu por completu al ferrocarril. Denunciámoslo n'ensame d'ocasiones y esti grupu parlamentariu ta cansáu yá de lleer, d'escuchar falses promeses que depués nunca se cumplen, plazos que nun lleguen, inversiones que nun s'executen”. Como paradigma, señaló'l diputáu, el soterramientu de Llangréu, paralizáu a pesar de les ingentes inversiones realizaes y les promeses siguíes o les faltes na llínea Llaviana-Xixón.

Zapico reivindicó un ferrocarril "públicu, calidable y vertebrador" que, añedió, debe amás formar parte de les midíes que dexen una meyor llucha contra la contaminación. Nesti contestu, enfatizó, Izquierda Xunida va sumar al llamamientu de la Plataforma pol Soterramientu de Llangréu, que convocó pal próximu sábadu 19 una marcha a cuerpu ente Llaviana y La Felguera pa esixir que s'acaben les demorances.

Pa poner fin, Zapico reclamó plantegar l'asunción de les competencies ferroviaries pa lo que, esixó, l'Alministración Central tien qu'asumir les inversiones necesaries pa dexar la rede en condiciones afayadices. El diputáu recordó que nun sería la primer vegada qu'una Comunidá Autónoma faise cargu de la xestión ferroviaria y, nesi sentíu, citó de forma espresa a Euskadi.

Pela so parte, el Voceru de la Plataforma pol Soterramientu de Llangréu, David García, reprochó non solo los incumplimientos nel proyectu pa la eliminación de la barrera ferroviaria sinón tamién na xestión de la llínea Llaviana-Xixón que, alvirtió, “tien un negru futuru”. Y ye que, siguió, nun se tán realizando llabores fayadizos de caltenimientu nin de trazáu, nin nes estaciones nin tampoco nel material rodante.

Pa la Plataforma, ye escandaloso que, tres un gastu nos llabores de soterramientu de 100 millones d'euros -primeramente habíen presupuestaose 50- el proyectu siga inacabáu lo que, al so xuiciu, pon en riesgu la mesma llínea ferroviaria pos, esplicó David García, “Ensin soterramientu nun hai futuru pa la llínea Xixón-Llaviana”.

La Plataforma esixó que se concluya d'una vegada la obra de soterramientu, eso sí, matizó'l so voceru, non a cualquier preciu: “Queremos dexar claro esto, dempués de les declaraciones, nel día d'ayeri, de l'Alcaldesa de Llangréu y del conceyal d'urbanismu: tamos a favor de que se desenvuelva la obra, faltaría más; tamos a favor de que se roble'l conveniu pero non a cualquier preciu”.

David García denunció'l silenciu municipal al respective de l'ausencia del Ministeriu de Fomentu nel nuevu conveniu pa la execución de la obra, a pesar de que primeramente esti departamentu, representáu entós pola ministra Madalena Álvarez, yera una parte más nel alcuerdu pal desenvolvimientu del proyectu. “Ye bien grave qu'un organismu públicu que nel añu 2007 firma, al pie de les otres alministraciones y ADIF (naquel momentu FEVE”), un conveniu, suma de la nueche al día”.

Pero les demorances tamién tienen que ver con decisiones electoralistes, como lo probaría qu'antes d'abril refugárase un borrador de conveniu qu'agora s'acepta. “Dende la Pataforma entendemos qu'hai una tema política nesi refugu al tercer borrador nel mes d'abril, que yera qu'había unes elecciones xenerales nel mes d'abril y unes elecciones autonómiques y municipales nel mes de mayu y taben esperando a que nes trés alministraciones gobernaren los de siempre: los de siempre que lleven con desidia esta obra y dilatándola nel tiempu”. Asina, esplicó David García a entrugues de los medios, la firma nun llegó a producise porque “naquel momentu gobernaba en Llangréu xuna coalición d'Izquierda Xunida-Somos y n'Asturies y en Madrid el PSOE. Nun taba bien visto qu'un Alcalde d'otru signu políticu roblara y tuviera na firma d'esi conveniu”.

Volver

Compartir

2014 Izquierda Xunida d'Asturies - Política de privacidad - Política de cookies