Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

Propuestes realizaes dende IX Asturies pa cola crisis pol coronavirus n'Asturies y n'España

 

Envaloraos compañeros y compañeres, nestos díes, selmanes yá, d'aislamientu motiváu pola crisis del coronavirus y la declaración del estáu d'Alarma, el trabayu políticu d'Izquierda Xunida caltúvose, dende la llealtá a los Gobiernos d'Asturies y d'España y, tamién dende la propuesta.

Dende IX Asturies tuvimos activos p'analizar la situación y poder plantegar midíes que sirvan pa dar respuesta a los retos y necesidaes surdíos de resultes de la emerxencia sanitaria. Tratemos de faelo ensin perder de vista que se trata d'un problema global nel que namái midíes globales van poder tener efectos pa controlar, primero, y superar, dempués, la pandemia.

Axuntámosvos por esta vía cuatro documentos que contienen parte d'esi trabayu y propuestes.

El primeru d'ellos, foi unviáu'l pasáu 16 de marzu a los nuesos compañeros y compañeres d'IX Federal pa la so incorporación dientro de les estratexes plantegaes pol Grupu Parlamentariu de Xuníes Podemos cola vista puesta nel Conseyu de Ministros que se celebró a otru día (17 de marzu) y nel que s'adoptaron, yá, les primeres midíes.

Sol titulu "Midíes coronavirus", plantegamos un paquete de midíes empobinaes a embrivir les consecuencies económiques y llaborales pa la clase trabayadora y los grupos más vulnerables.

El 18 de marzu, unviamos al Gobiernu d'Asturies, amás, el documentu Midíes Asturies, con propuestes específiques pa implementar nel ámbitu autonómicu, en materies de salú; intervención social; medies urxentes nel ámbitu socioeconómicu; y d'información a la ciudadanía.

Amás, con fecha de güei, 26 de marzu, diose treslláu al Gobiernu d'Asturies d'una nueva batería de propuestes d'acción, en dos documentos aprobaos pol Secretariáu d'Izquierda Xunida d'Asturies na so sesión d'ayeri, 25 de marzu. Nesti casu, pídese (documentu Propuestes), ente otres cuestiones, la convocatoria del pactu de concertación Social, proponiendo, dada la situación d'emerxencia esceición, que participe la Federación Asturiana de Conceyos (FACC) como convidada, dada la implicación de les alministraciones locales.

Amás, sol títulu Propuesta midíes Sociales" con midíes urxentes en relación a residencies pa mayores (tanto pa persones usuaries como plantiyes); persones mayores non institucionalizaes; y otros colectivos vulnerables.

Nos cuatro documentos axuntos vais poder conocer, al detalle, les propuestes ya iniciatives realizaes con relación a la crisis sanitaria pol COVID19.

 

Ovidio Zapico 
Coordinador General de Izquierda Unida de Asturias/Izquierda Xunida

Volver

Compartir

2014 Izquierda Xunida d'Asturies - Política de privacidad - Política de cookies