Menu

Tres la comparecencia virtual del Conseyeru de Salú, Ángela Vallina fai un llamamientu a la mocedá por que nun baxe la guardia énte una enfermedá que tamién-yos afecta

La vocera d'Izquierda Xunida na Xunta Xeneral del Principáu, Ángela Vallina, destacó güei la tresparencia del Gobiernu d'Asturies nel treslláu d'información sobro la pandemia del coronavirus. Vallina, que participó güei nuna comparecencia virtual del Conseyeru de Salú, Pablo Fernández Muñiz, esplicó tres la mesma que los datos ponen de manifiestu que les tases d'infección son inferiores n'Asturies a la media nacional daqué que, dixo, “tien que sirvinos pa estremar los precuros y les midíes pa caltener lo más contenida posible esta pandemia”.

La cierta progresividá nes infecciones ta evitando, amás, el colapsu del sistema sanitariu Asturianu. “Yo felicitaría al Conseyeru pol bon desempeñu de tolos profesionales que tán dando lo meyor de sí mesmos pa responder a esti retu del coronavirus; el so bon faer hai que sumalo al nuesu sistema sanitariu, a la nuesa sanidá; un sistema sanitariu como l'asturianu, que, frente a otros de comunidaes como vemos agora, sufrió meyor los peores tiempos de la crisis económica; retayóse muncho menos y eso esplica de xuru esta mayor capacidá pa ufiertar curiaos a les persones que tán afectaes por esta enfermedá. Si non fora pola nuesa sanidá toi segura de que la situación sería dafechu la contraria y tendríamos un pergrave problema

La diputada enfatizó en qu'esta esperiencia tien que sirvir pal

futuru: “nun tenemos d'escaecer esto. Tenemos De aprender qu'hai una raya colorada cola sanidá. Non puede retayase”.

Vallina llamó a caltener la unidá política d'acción y, sobremanera, y a poner cuantes midíes sían necesaries pa detectar la enfermedá y evitar el so espardimientu. Al respective de los test rápidos, la vocera d'IX se congratuló porque n'Asturies sían menos necesarios, yá que se cunta con un llaboratoriu especializáu y referente nacional que dexa la realización de pruebes convencionales a bon ritmu.

La pandemia ta afectando a tolos grupos poblacionales y, anque'l mayor efectu ta produciéndose ente les persones de más edá, enfatizó la vocera d'IX, naide ta exentu de l'andada. Por eso, Ángela Vallina fixo un llamamientu a la población más nueva pa “que nun baxe la guardia y estreme los precuros porque acaldía vemos más casos en mozos”