Menu

Alberto Tirador aboga pola corresponsabilidá, non pola imposición, y reivindica que los fondos nun pueden emplegase pa gastos xenerales del Estáu, pa los qu'esisten otros mecanismos financieros

Izquierda Xunida esixó güei que cualquier midida que s'adopte sobre'l superávit municipal realícese previa negociación y consensu de los conceyos. El secretariu de Política Municipal, Alberto Tirador, aseguró güei, en relación a la posibilidá de que'l Ministeriu de Facienda pretenda utilizar estos fondos, qu'esta decisión nun puede plantegase al marxe de les propios conceyos. Tirador precisó que sobre l'asuntu la Federación Española de Conceyos y Provincies (FEMP) nun tien nestos momentos nenguna conocencia nin oficial nin oficiosa. Sía comoquier, añedió'l tamién alcalde d'Illas, "nada se debe nin puede faese al marxe de los mesmos conceyos; creo que tenemos, primero, que reconocer qu'éstos son una parte importante de l'Alministración y como tal tienen que ser trataos; segundu, esos fondos que llevamos enforma tiempu reclamando dende los mesmos conceyos, tienen que ser destinaos a los mesmos conceyos y en llabores de fomentu de la inversión y por tanto económiques".

Pa IX, el superávit municipal nun tien d'emplegase pa gastos xenerales del Estáu. Pa eso, enfatizó Tirador, "tien d'usase la delda y l'ampliu marxe fiscal qu'hai n'España pa coles grandes fortunes y, poques gracies, un bon alcuerdu con Europa"

Alberto Tirador alvirtió tamién de la necesidá de tener bien en cuenta la situación demográfica española, con zones bien urbanizaes y poblaes y auténticos desiertos demográficos. Nesti sentíu, aseguró que ye necesario evitar que s'acentúen les diferencies ente la España rural y l'urbana. "Si esgañense los conceyos contribuirase a aumentar más la fienda de la España balerada".

Sía que non, esplicó'l responsable de Política Municipal d’IX Asturies, "nun puede tirase d'esi dineru pa pagar gastos estatales o faer caxa común. Nun falamos de ser insolidarios, sinón de ser corresponsables. Y, nesa corresponsabilidá, nun pueden imponese a nenguna alministración plantegamientos ensin negociación de nengún tipu. L'oxetivu tien que ser la ciudadanía".

Alberto Tirador recordó que lo qu'esiste ye un estáu d'alarma pero non una suspensión de la democracia nin, añedió, "del respetu constitucional a una parte del estáu que nun ye menor d'edá".