Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

IX pide que s'estudie un impuestu a los más ricos pa financiar los retos sociales y pa la reactivación pol COVID19

La vocera d'IX apuesta por abrir l'alderique que tien de ser d'ámbitu européu pa evitar "fugues" de riqueza.

La vocera d'IX na Xunta Xeneral del Principáu, Ángela Vallina, pidió güei na comparecencia de la Conseyera de Facienda, Ana Cárcaba, que s'estudie la propuesta d'economistes internacionales pa la creación d'una impuestu a les grandes fortunes, empobináu a dar respuesta a les necesidaes provocaes pol COVID-19, nun cambéu de modelu fiscal que, matizó, tien de plantegase dende'l contestu européu. Namái n'España, podríen recaldase 84.000 si pon l'impuestu al 10 per cientu de la población más rica.

L'alderique, esplicó Vallina, yá ta abiertu n'Italia y ye necesario que s'estudie nel senu de la Unión Europea. La propuesta parte d'economistes d'entidaes tan prestixoses como la London School of Economics (LSE) o la norteamericana Berkeley pero tamién d'especialistes españoles como Carles Manera o Daniel Raventós. “Planteguen qu'aquellos con un patrimoniu mayor de dos millones d'euros abonen un 1% de la so riqueza, un tipu que s'alzaría al 2% en casu de superar los 8 millones y al 3% si devasaren los 1.000 millones. Ye hora de qu’a les grandes fortunes tóque-yos arimar el costazu”.

Pa la diputada, si quier caltenese l'Estáu del Bienestar ye imprescindible repensar el modelu fiscal: “lo ideal, ye que fora a nivel européu porque facilitaría qu'eses grandes fortunes nun movieren la so capital escontra otros países. En concencia, lo que nun se puede plantegar dende la Unión Europea ye qu'asoceda lo qu'asocedió na anterior crisis y ye qu'esto se resuelva con retayos y tamién apertando la petrina a les clases populares, a les persones d'a pie, por que sigan siendo les que paguen les crisis”.

Esbardiar esta oportunidá nel panorama comuñal supondría, según Ángela Valllina, “la defenestración del conceutu d'Unión Europea solidaria y esmolecida polos sos ciudadanos y ciudadanes”.

Sía que non, reprochó la vocera d'Izquierda Xunida, ye inaceptable la posición de les dereches de pidir más inversión pública y coles mesmes negase a una reforma fiscal ya inclusive plantegar una rebaxa d'impuestos. “Nestos momentos nun esiste la posibilidá de baxar impuestos porque lo qu'hai que faer yá lo había que faer antes de la crisis sanitaria, que ye faer un sistema fiscal xustu y solidariu y progresivu que ye lo que nos manda la Constitución Española”.

Volver

Compartir

2014 Izquierda Xunida d'Asturies - Política de privacidad - Política de cookies