Menu

Ángela Vallina aprofia la importancia de la participación pública na toma decisiones nuna industria que ye estratéxica, al igual qu'asocede na mayoría de países de la UE

IX reivindicó güei la necesidá de la participación del Estáu nel sector enerxéticu, d'actualidá pol anunciu de EDP de vienta a la francesa Total de parte del so negociu eléctricu n'Asturies y n'España. La vocera parlamentaria de la formación, Ángela Vallina, a cuenta de esta operación, esplicó qu'entá hai qu'esperar pa conocer los pormenores de la operación, que, dixo, "paez sobremanera la vienta de la cartera de veceros y non tantu de les instalaciones de producción enerxética que se caltendríen en manos de EDP". Pa la diputada, la principal esmolición ta siempres na continuidá de les instalaciones, de la producción y especialmente del emplegu, ensin escaecer, tampoco, a consumidores, que pasen, paez, d'unos a otros provisores ensin ser consultaos y ensin intervención estatal.

"Aportunamos en que ye necesario non yá un control al traviés de les regulaciones del Estáu sinón cola mesma presencia del Estáu, con capacidá tamién na toma d'eses decisiones. Nestos momentos, dase la paradoxa de que tán entrando nel mercáu español empreses d'otros países, con capital públicu d'esos países. Y, como ye obvio, les empreses respuenden a los sos propios intereses accionariales y, cuando pertenecen a un Estáu, a los mesmos intereses d'esi otru Estáu. Nun puede ser qu'España dexe en manos de terceros un sector tan estratéxicu".

Pa Izquierda Xunida, en cualquier operación sobro los sos sectores industriales y, nesti casu, de la compañía eléctrica, enfatizó Vallina, "ye la continuidá de les instalaciones actuales de EDP, de la producción y, especialmente, del emplegu. Pero, sía que non, más allá d'esta operación concreta, creemos que ye indispensable qu'en sectores estratéxicos, y l'eléctricu de xuru ye unu d'ellos, tien que tener una presencia activa de los poderes públicos. Y cuando falamos, y de la eletricidá tamos falándolo, d'una de les arteries principales na seguridá d'un país. Aportunamos, una y otra vez, en que ye necesario non solo un control al traviés de la regulaciones del Estáu sinón esactamente eso, como dicíamos antes, cola presencia del Estáu, con capacidá tamién en tomar eses decisiones".

La vocera d'IX na Xunta Xeneral recordó que na mayoría de países europeos l'Estáu tien una participación nos sos sectores estratéxicos: "el casu d'España, en concencia, ye inusual, cuandoquier", concluyó.