Ovidio Zapico reprocha que cada dos o trés meses ténganse que plantegar cambeos énte les faltes del marcu actual de funcionamientu del Parlamentu pa dar respuesta a les nueves necesidaes
Ovidio Zapico reclamó güei na Xunta Xeneral del Principáu una reforma global del Reglamentu del Parlamentu asturianu, daqué al so xuiciu indispensable énte la necesidá de cambeos permanentes nel funcionamientu internu de la Cámara.
"Lo que tamos faciendo ye venir con romiendos", espetó'l diputáu na so vez pa esplicar la posición sobro la reforma del Reglamentu que se trataba y que'l so fin yera dexar les comparecencies telemátiques. Y ye qu'esti cambéu del marcu de funcionamientu de la Cámara asturiana llegaba como una más de munches que se tuvieron qu'adoptar nos últimos meses pa tratar de dar respuesta a nueves situaciones non contemplaes.
Zapico amosóse convencíu de que la reforma ye indispensable, por culpa de que, recordó, "prácticamente cada dos o trés meses hai una reforma de Reglamentu: pal votu telemáticu; agora pa les videoconferencies; primero pa esa anomalía que nun ye frutu del reglamentu, sinón d'una llei electoral inxusta como la que suponía qu'el 20% de los asturianos tuviéramos nel mesmu grupu parlamentariu. Y yo dígo-y a eses señoríes y a esos grupos parlamentarios que tanto interés tienen na reforma del Reglamentu, que la impulsen d'una vegada y decididamente, porque lo que tamos faciendo ye venir con romiendos a zurcir el Reglamentu".
El parllamentariu pidió valentía pa empecipiar un procesu de reforma que lleven muncho tiempu pidiendo y a la que fiaben coses tan lóxiques como dexar la esistencia de grupos parlamentarios representativos de la mayor pluralidá política salida de les urnes. "Tamos seguros que si esperáramos, como ustedes dicíennos a una reforma global del Reglamentu, pos eso: el 20% de los asturianos siguiríamos nel mesmu grupu parlamentariu. Y poro, eso ye engañar a nós mesmos. Lo que tenemos de faer ye sentanos, de verdá. Mañana empecípiense los trabayos, pero que s'empecipien y que nun se paralicen; que tengan un desenvolvimientu yá constante que dexen afaer esi Reglamentu a les necesidaes qu'ustedes dicen".
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies