Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

IX va proponer una “tasa por estancia turística” pa financiar los sobrecostos de los servicios municipales y caltener los recursos turísticos

La formación envalora que podríen recaldar más de 10 millones d'euros con una midida que sirviría pa desafogar a los Conceyos y ameyorar la preservación del medioambiente

La vocera parlamentaria d'Izquierda Xunida, Ángela Vallina, plantegó güei la necesidá de poner en marcha un tributu por estancia turística similar al qu'esiste en Cataluña, Baleares y en más de ciento cincuenta ciudaes europees. L'oxetivu, según señaló la diputada, “ye qu'Asturies pueda disponer de recursos financieros suplementarios pa financiar tanto la medría de la carga los servicios públicos municipales pola medría estacional de la población, como la meyora de la calidá ambiental y de los recursos turísticos de la nuesa Comunidá Autónoma”.

Vallina reconoció la importancia del sector turísticu y la so capacidá de xenerar riqueza. Sicasí, la medría de la presión turística, matizó, “puede traer problemes de saturación y llena de los servicios públicos, soportaos en bona midida polos conceyos”

La diputada esplicó, amás, que'l caltenimientu de la competitividá de la ufierta turística ta íntimamente amestáu a la so sostenibilidá: “si nun respetamos la capacidá de carga y garantizamos medioambientalmente los nuesos recursos naturales, vamos tar poniendo en peligru a mediu y llargu plazu tol sector, al perder precisamente esi plus diferenciador que fai d'Asturies un destín altamente valoráu pola calidá de la so ufierta”

Frente a ello, Vallina apostó por midíes qu'aseguren la sostenibilidá. “Creemos que ye xusto que los que nos visiten tamién contribuyan con una pequena cantidá pa financiar la so protección”.

La vocera parlamentaria envaloró que la implantación d'una tasa turística con una cuantía similar a la de Baleares dexaría recaldar non menos de diez millones d'euros, que nun momentu d'amenorgamientu d'ingresos pueden ser fundamentales pa pagar los sobrecostos que'l turismu xenera a los conceyos como los proyectos de rexeneración medioambiental venceyaos a la sobresplotación turística.

Vallina consideró que la so implantación nun implicaría un impactu negativu pa la industria turístico de la nuesa Comunidá y punxo como exemplu Baleares y Cataluña que, sacantes la situación escepcional derivada del COVID-19 vieron añu tres d'añu amontáu'l so númberu de visitantes a pesar de tener enllantada la tasa turística. “Bonalmente, creo que son munchos más los beneficios que los perxuicios: naide dexa de visitar un llugar que merez la pena porque-y pongan una tasa turísticu medioambiental que'l so costu ye mínimu sobre'l preciu final del so viaxe”.

Vallina amosóse partidaria de que la tasa configurese como un ingresu fiscal de calter finalista y abogó porque na distribución de los recursos que se xeneren destínese un porcentaxe directamente a los conceyos, invirtiendo'l restu de recaldar teniendo en cuenta la opinión de la FAC, pal so usu en proyectos concretos de rexeneración ambiental y meyora de los recursos turísticos.

“Los conceyos tienen que tener un papel fundamental na implantación y xestión d'esa tasa qu'hai de sirvir pa embrivir l'impactu ambiental y social del turismu y non pa otres coses”, hai enfatizado la diputada.

La dirixente d'Izquierda Xunida d'Asturies tamién s'amosó partidaria d'ameyorar les polítiques d'ordenación y xestión de l'actividá turística evitando situaciones de sobresaturación d'espacios turísticos como la que tán soportando munches zones del oriente d'Asturies. “Lo que tamos viendo estos díes en Cabrales o nel Sella ye inaceptable y más nestos tiempos de pandemia”. Por eso, d'acordies cola diputada, resulta imprescindible una intervención decidida del gobiernu d'Asturies por que la actividá turística na nuesa Comunidá Autónoma pueda siguise desenvolviendo de manera harmónica y la so crecedera nun implique un deterioru irreversible del equilibriu económico y medioambiental, al que la sociedá asturiana nin puede nin tien d'arrenunciar.

Volver

Compartir

2014 Izquierda Xunida d'Asturies - Política de privacidad - Política de cookies