Menu

El diputáu y Coordinador xeneral d'IX d'Asturies avanza que l'aforru de 34 millones na nómina del salariu social va caltenese nel circuitu de les polítiques sociales

La primer xunta a 3 bandes IX, PSOE y Podemos p'algamar un alcuerdu presupuestariu concluyó con bona sintonía. El diputáu y coordinador xeneral d'IX d'Asturies, Ovidio Zapico aseguró, a la salida del alcuentru, qu'esiste un entendimientu que fai confiar nun pactu que va dexar sacar alantre xunas cuentes progresistes y sociales para 2021.

Para'l coordinador d'IX ye satisfactoriu que, per primer vegada, les trés fuerces de la esquierda nel parlamentu asturianu sentárense para falar del presupuestu de 2021 y sobremanera, añedió, “para falar de lo que denominemos el corazón social del presupuestu “.

Polo pronto, hai entendimientu en destinar los aforros del salariu social, pola entrada a valir del ingresu vital mínimu estatal, a polítiques sociales, tal que reclamó IX en repitíes ocasiones. Asina, según les previsiones del gobiernu, la nómina del salariu social va amenorgar en daqué más 34 millones d'euros y tou esi dineru, avanzó Zapico, “ Va siguir tando nel circuitu de les polítiques sociales“.

Amás, va haber una medría importante d'esa cifra p'ameyorar cuestiones como l'atención a la dependencia. “En definitiva yo creo que foi un alcuentru que nos dexa avanzar y, salgo con una reflexón clara: cuando la izquierda siéntase, cuando la izquierda ye capaz de trabayar xunida, el corazón social d'Asturies, el corazón social de los presupuestos puede llatir con más fuerza “.