Menu

IX refugó güei les enmiendes a la totalidá presentaes frente al presupuestu 2021, apautáu col gobiernu y la Federación Socialista Asturiana (FSA).

La vocera de la formación, Angela Vallina, aseguró que la negociación dexó incluyir partíes importantes y que formen parte de la fueya de ruta fita nel alcuerdu de investidura, pero amás, añedió, les cuentes pal 2021 esixíen un esfuerzu adicional per parte de toles fuerces progresistes y democrátiques pa dar respuesta a los retos de la crisis global xenerada pola COVID-19. “La ocasión merecía que fixéramos política con mayúscules, non pa enfrentanos polo pequeno sinón pa xuninos pa consiguir lo grande”.

Según Vallina, les fuerces que van sofitar los presupuestos escucharon los reclamos de la ciudadanía: “la sociedá demándanos alcuerdos por que deamos solución a los sos problemes. Lo demás, nun-yos importa”.

La incapacidá pa sacar alantre les cuentes del añu próximu tendría, esplicó, consecuencies tanto no referío a la falta de recursos pa poder faer frente a los retos de la crisis, como dende una perspectiva sociolóxica, favoreciendo “estremismos “ pola falta d'entendimientu entre fuerces democrátiques y de la izquierda. “Por eso, valoramos como imprescindible qu'Asturies va cuntar con unos presupuestos marcadamente sociales pal añu 2021”.

IX articuló la negociación en trés bloques de prioridaes: de primeres, recursos abondos para encarar la crisis sanitaria y los sos efectos na salú, pero tamién nel ámbitu educativo y social; de segundes, recursos pa embrivir l'impactu económicu nos sectores sociales más afectaos y más vulnerables; y, de terceres, incorporando los conteníos del alcuerdu de concertación social que se roblara nel branu colos sindicatos y colos representantes empresariales. Angela Vallina destacó que les cuentes pa 2021 van ser les más importantes de tola serie histórica y ello a pesar de la cayida na recaldación que se preve, lo que demuestra, dixo, l'esfuerzu pa llograr qu'éstes sían les cuentes más sociales posibles.

Nesta situación d'esbarrumbe d'ingresos, la vocera d'IX manifestó'l so plasmu énte les posiciones de los grupos más a la derecha, que siguen aportunando nel amenorgamientu d'impuestos pa los más ricos, de la que piden menos delda y más recursos. Eses posiciones, reprochó Vallina, son incompatibles si quier garantizase la suficiencia financiera y les cobertories sociales y de reactivación económica. Frente a ello, la parllamentaria apostó por un modelu fiscal progresivu y equitativo, y pola harmonización fiscal pa evitar que delles comunidaes autónomes faigan dumping colos sos impuestos, nun intentu de convertise en paraísos fiscales pa los más ricos.

Pa IX, los presupuestos del 2021 amuesen amás qu'esisten polítiques distintes pa encarar les crisis. Nesti sentíu, Angela Vallina recordó que, na anterior recesión económica, l'apueste de les dereches n'España y n'Europa supunxo cargar sobro les clases trabayadores y les más vulnerables el pesu de los axustes. Frente a ello, enfatizó la diputada, les cuentes d'Asturies suponen dar per remataes les polítiques del austericidiu.