Menu

Ángela Vallina: “Nun podemos siguir con una Conseyería d'Industria sumisa y paralizada frente a lo que podemos considerar como un grave ataque a la llínea de flotación de la viabilidá del nuesu sector industrial”.

Izquierda Xunida impulsó que'l Parlamentu asturianu celebre un plenu estraordinariu y monográficu sobro industria énte l'aparente inmovilidá del departamentu que dirixe Enrique Fernández. IX, Partíu Popular, Podemos, Ciudadanos y Foro rexistraron güei el pidimientu d'esta sesión de control pa encetar la difícil situación del sector industrial, tantu pol varapalU del nuevu estatutu pa les electrointensives, que nun tien en cuenta les necesidaes de delles de les más importantes compañíes Asturies, como pola necesidá de diseñar y poner en marcha una política industrial hasta agora inesistente.

La vocera d'IX, Ángela Vallina, aseguró, en rexistrando'l pidimientu de convocatoria, que'l plenu sobro industria ye imprescindible. “La situación pola que traviesa'l nuesu sector industrial esixe un compromisu de tola sociedá asturiana, de tolos axentes sociales y de tol parlamentu", enfatizó la diputada pa quien ye imprescindible diseñar un plan industrial frente a una Conseyería, añedió, "sumisa y paralizada frente a lo que podemos considerar como un grave ataque a la llínea de flotación de la viabilidá del nuesu sector industrial”.

Vallina reclamó capacidá d'analís al Gobiernu que, al so xuiciu, tien d'asumir so responsabilidá. “Nun podemos siguir como hasta agora. Precisamos un Gobiernu que lidere la defensa de la nuesa industria, atendiendo a les necesidaes de tol sector. Ye unu de los grandes retos p'Asturies como país. O vamos ser un territoriu industrial o, de xuru, nun vamos ser. El retu demográficu, el regresu de la nuesa mocedá expatriada y la garantía de supervivencia como pueblu depende de lo que faigamos agora y nel diseñu del futuru precisamos poner como una pieza clave la nuesa industria, por una capacidá d'emplegu calidable, de pensiones dignes nel futuru: si agora somos una de les Comunidaes coles pensiones más altes, precisamente foi pol nuesu pasáu industrial”.

La defensa del texíu granible asturianu, aprofió la vocera d'IX, nun solo tien implicaciones p'Asturies sinón como sector estratéxicu pal conxuntu del Estáu: "nun escaezamos que la industria asturiano ye la industria d'España"