Menu

Ovidio Zapico reclamó que se prime la negociación colectiva" y que s'aproveche la instalación del xigante de la distribución pa rellanzar el Polígonu de Bobes como un nuevu polu d'atracción industrial

IX pidió güei que s'arbitren midíes pa dexar la coesistencia del comerciu local con Amazon, a la que demandó primar la negociación colectiva" nel so modelu de xestión en Siero. El coordinador xeneral d'IX, Ovidio Zapico, y la vocera parlamentaria, Ángela Vallina, fueron informaos güei del proyectu pal Polígonu de Siero que, al so xuiciu, tien de convertise nun polu d'atracción d'industria. Zapico reclamó tamién al xigante de la distribución que presente'l so proyectu tamién a Comisiones Obreres (CCOO) y Unión Xeneral de Trabayadores (UXT).

"Siendo conscientes de que pueda tener una incidencia nel comerciu local d'Asturies, esa mesma incidencia esta planta loxística tienla tamién si se construyera en Benavente o si construyera en Vitoria. Polo tanto saludamos que decidieren esa construcción n'Asturies, decidieren esa construcción nel Polígonu de Bobes", señaló Zapico, pa quien tien d'aprovechase la instalación d’Amazon como una oportunidá, de primeres, pa rellanzar esta zona industrial. Nesti sentíu, el parllamentariu recordó l'apueste d'IX por poner en serviciu estos terrenes que'l so desenvolvimientu llevaba demasiaos años paralizáu. Nesti sentíu, Zapìco enfatizó qu'IX "siempres" defendiera, "contra'l criteriu del restu de la oposición" protexer y desenvolver el polígonu pa convertilu nun focu con capacidá pa xenerar industria y empléu calidable.

Na xunta caltenida güei, IX treslladó tamién al vicepresidente, Juan Cofiño, la necesidá d'aprovechar la llegada d’Amazon por que s’asitien más empreses, pa lo que, añedió, ye imprescindible ameyorar les comunicaciones. "Ye vital non solo terminar yá'l desenvolvimientu del polígonu sinón la continuidá de la AS 17: lleva munchos años parada en San Miguel de la Barreda; tamién ye importante agora esplegar tol potencial d'esa nueva autovía que puede ser l'AS III, que comunique Llangréu con Avilés", señaló Zapico, pa quien ye imprescindible, amás, complementar esa meyora d'infraestructures con nueves llínees a cubrir pol Consorciu de Tresporte d'Asturies pa comunicar el polígonu coles principales ciudaes d'Asturies.