Menu

Ángela Vallina reprocha qu'Educación dexara que'l Consorciu de Tresportes impunxera los sos criterios entá a mariña del derechu del alumnáu a recibir esti serviciu

Izquierda Xunida llogró güei el sofitu de la mayoría de la Xunta Xeneral del Principáu por que'l Gobiernu resuelva, d'una vegada por toes, los problemes de tresportes escolar, dando soluciones que garanticen el derechu d'alumnos y alumnes que, nestos momentos, atopense con graves dificultaes pa poder asistir a los sos respectivos centros educativos. La vocera d'IX, Ángela Vallina, defendió la oportunidá d'esta moción subsiguiente a la so interpelación urxente al Conseyu de Gobiernu sobro política xeneral en materia de tresporte escolar, cuantimás nel ámbitu rural- énte los casos que se rexistren, cada añu, especialmente nes zones rurales, d'alumnos y alumnes de primaria y secundaria, a quien, “por una razón o por otra, nun se-yos garantiza'l serviciu de tresporte dende la so casa hasta'l so centru educativu”.

Ángela Vallina reivindicó xuna solución qu'incluya tamién garantía de tresporte p'alumnos y alumnes de los centros d'educación especial, incluyendo a los de Sanatoriu Marítimu de Xixón, daqué que nestos momentos nun se cumple, xenerando importantes problemes pa escolares y families.

La moción encamienta al Gobiernu d'Asturies a ellaborar la Programación de Tresporte Escolar que prime los intereses de los escolares atendíos frente al de les empreses qu'empresten el serviciu.

Amás, esíxese modificar el Resolvimientu de 5 de xunu de 2017 pola que se regula la prestación del serviciu de tresporte escolar pal alumnáu de centros docentes públicos non universitarios, que dexe que s'antemane xuna financiamientu abondu cuando'l tresporte sía xestionáu en tou o en parte poles families.

La iniciativa d'IX plantega amás reforzar el papel de la Conseyería d'Educación nel control y xestión del serviciu de tresporte escolar, impartiendo les necesaries instrucciones al Consorciu de Tresportes, afitando los estándares calidable na prestación del serviciu y controlando en tou momentu que'l serviciu de tresporte empréstese garantizando de manera eficaz el derechu a la educación.

D'últimes encamiéntase al Conseyu de Gobiernu a informar afechiscamente a les families, especialmente de la zona rural y de quien moren a más de 1500 metros del so centru escolar, del so derechu a disponer de tresporte escolar facilitando'l so usu.

Ángela Vallina reprochó la falta de respuestes de la Conseyería d'Educación, a pesar de que, de forma repitida, viénose encetando los problemes del tresporte nel Parlamentu. Les escuses que se ponen, hai enfatizado la diputada, son siempres les mesmes: “dificultaes técniques, problemes de seguridá vial, que la parada que s'ufierta ta a menos d'un kilómetru y mediu andando de la casa y, poro, acordies con la normativa aplicable, non puede atendese el pidimientu d'establecer una parada más cercana”.

Como exemplu, Vallina citó'l paradóxicu casu d'una familia de Villanueva, Siero, na que se-y niega la parada escolar a un alumnu de secundaria, que, sicasí, sí empresta a les alumnes y alumnos de primaria. “A entrugues d'esti grupu parlamentariu, la Conseyería aliega qu'esisten dificultaes técniques pa establecer una parada nesi llugar pola dificultá de maniobra d'un autobús de 13 metros, pero, y asorar señoríes, respuéndenos lliteralmente que: anque fuera vidable técnicamente namái lo sería pa facilitar la recoyida d'una única persona en desterciu de la calidá del serviciu emprestáu al restu de los usuarios, que veríen allargáu'l so percorríu en diez minutos”.

Les consecuencies, punxo de manifiestu la vocera d'IX, afecten a derechos d'alumnos y alumnes pero vien tamién a sobrecargar, de forma mayoritaria, a les madres que son les que, a la fin tienen qu'ocupase de llograr que los sos fíos y fíes puedan llegar a los sos colexos. “Siempres son les madres les que tienen qu'invertir un tiempu que nun tienen y unos recursos que nun-yos sobren pa faer lo que l'alministración tendría de faer y nun fai. Nesti como n'otros munchos asuntos, se sobrecarga siempres a les muyeres”, resumió.

Les faltes nel tresporte escolar son tan graves qu'hasta la Sindicatura de Cuentes, nel so Informe Definitivu de Fiscalización sobro Tresporte Escolar del Cursu 2017-2018, denunció que la planificación del tresporte escolar n'Asturies porque, afirmó Ángela Vallina. Y ye que, añedió la diputada, el serviciu que s'empresta “nun respuende a les auténtiques necesidaes de la ciudadanía, especialmente de quien viven na zona rural o de los colectivos más vulnerables. Antes, al contrariu, y como se punxo de manifiestu en munches ocasiones, y foi oxetu de denuncia de colectivos vecinales, sindicales y sociales añu tres d'añu, la planificación del tresporte escolar n'Asturies ta marcada polos criterios del Consorciu de Tresportes que, nun podemos escaecer, respuenden a los intereses de les empreses tresportistes. Porque los usuarios de los que fala la respuesta que lleí, respuesta que toi segura de que foi redactada pol Consorciu de Tresportes, nun son los escolares que van al so centru educativu, sinón de xuru son otros usuarios que comparten coles neñes y los neños l'autobús”