Menu

Dende Izquierda Xunida reafitamos, nuna fecha tan importante pa la tradición democrática y emancipatoria nel nuesu país como la de güei, el nuesu firme apueste por siguir construyendo, xuntos y xuntes, un país más xustu, más democráticu y más fraternu.

El día de güei, 14 d'abril de 2021, ye una fecha importante pa la ciudadanía demócrata del nuesu país. Cumplir 90 años de la proclamación de la Segunda República, un procesu históricu que constituyó una meyora incalculable en términos de democracia y xusticia social. El nuesu país sigue teniendo asignatures pindies que nun escaecemos, como la plena reconocencia de quien llucharon pola llibertá y la democracia frente al fascismu, pero güei la República ye sinónimu de futuru y esperanza. Futuru énte la decadencia d'un réxime incapaz de satisfaer les sos propies mires y esperanza frente al odiu de quien quieren llevanos al pasáu y el mieu a les meyores de quien se conformen cola situación actual.

Ye'l momentu de trabayar per un país republicanu que ponga la vida de les families trabayadores nel centru. Pa ello, ye necesario construyir un horizonte compartíu ente toos y toes, dibuxando un nuevu imaxinariu tresformador que se comprometa colos actuales retos sociales, culturales, políticos ya institucionales. Falar de República ye falar d'un país ecoloxista, feminista y plural que fai de la xusticia social la so bandera. Falar de República ye falar de derechos sociales y de condiciones de vida dignes pa la clase trabayadora y los sectores populares. Falar de República ye falar de xusticia, democracia y llibertá.

Lluchamos per un país ecoloxista qu'apueste por un modelu económicu responsable col mediu ambiente y el planeta, un país feminista qu'acabe cola lacra del machismu y garantice igualdá na diversidá, y un país plural que vea na so complexidá cultural y nacional xuna riqueza que tien de ser curiada. Lluchamos per un país con xusticia social nel que los derechos de el trabayadores y les trabayadores tean percima de los intereses de les oligarquíes avezaes a mandar ensin presentase a les elecciones.

El nuesu proyectu de país y modelu d'Estáu tienen de ser construyíos de manera participativa, pos la República ye un proyectu popular de mayoríes que conecta coles esmoliciones cotidianes de la ciudadanía. La monarquía escarez de llexitimidá non solo d'orixe, sinón pola so corrupción y el so papel estructural como enllaz ente los poderes económicos y los poderes políticu y mediáticu. Monarquía ye sinónimu de pasáu y decadencia. Sicasí, la República ye un proyectu integral y renovador de país que toma'l conxuntu de problemes, inxusticies y pruyimientos de la ciudadanía, más allá del ámbitu institucional. Dende estes coordenaes faemos un llamamientu al conxuntu de la ciudadanía demócrata y progresista por que se sume a la construcción colectiva del republicanismu.

Dende Izquierda Xunida reafitamos, nuna fecha tan importante pa la tradición democrática y emancipatoria nel nuesu país como la de güei, el nuesu firme apueste por siguir construyendo, xuntos y xuntes, un país más xustu, más democráticu y más fraternu.