Menu

Ovidio Zapico alvierte que ye imprescindible universallizar la inmunización garantizando l'accesu como "bien universal d'accesu llibre"

Izquierda Xunida defendió güei tresparencia en contratos y negociaciones colos llaboratorios farmacéuticos en materia de vacunes de la que defendió la lliberalización de les patentes, siquier mientres se caltenga la situación d'emerxencia. El diputáu y coordinador xeneral de la formación, pidió a los grupos de la Xunta Xeneral del Principáu sofitu pa sacar alantre una proposición non de llei (PNL) na que, amás, pretende encamentase al Gobiernu de la nación por qu'abandere una postura na que se considere vacunes, melecines, pruebes de diagnósticu y otres tecnoloxíes de la COVID-19 como “bien universal d'accesu llibre y seguro”.

La PNl -que salió aprobada colos votos d'IX, Podemos, PSOE- plantega que l'Axencia Europea de la Melecina realice la evaluación, autorización y alquisición pa la so distribución d'otres vacunes, y favorecer y collaborar con aquellos proyectos qu'amosaron la so intención de poner les sos patentes y capacidaes granibles como bien común pal conxuntu de los países en víes de desenvolvimientu.

Amás, Ovidio Zapico defendió que s'amonten les aportaciones al Fondu COVAX, a la collaboración col C-TAP de la OMS y al conxuntu de polítiques de cooperación pa fortalecer los sistemes sanitarios de los países en víes de desenvolvimientu.

A lo último, reclámase una medría de los esfuerzos presupuestarios en materia de sanidá, investigación y desenvolvimientu y garantizar que la inversión pública tien una torna económico y social no público, esto ye, en tola ciudadanía, por aciu el fomentu de les patentes públiques.

La pandemia del coronavirus demostró, según Zapico, una “vulnerabilidá del sistema políticu y económicu nel que vivimos”. Al pie de ello, aprofió, la crisis sanitaria punxo n'evidencia la “importancia de lo público”, al englobar la salú pero tamién bona parte de la inversión na investigación. Ello ye que’l diputáu remarcó que fueron los fondos de los distintos Estaos los que llograron financiar los estudios p’algamar nun espaciu curtiu de tiempu les “allampaes” vacunes”.

Pero, alvirtió Ovidio Zapico, nun puede pensase qu'acciones unillaterales nunu o notru Estáu van garantizar la salú de la población. Por eso, pidió que se faiga un planteamientu a nivel mundial.

El problema agrávase porque, en demasiaes ocasiones, les compañíes farmacéutiques nun cumplen contratos o faciliten les vacunes al meyor postor.

El coordinador d'IX xustificó la pertinencia de la propuesta non yá dende una perspectiva práctica sinón tamién de concepción política: “Teniendo bien claro que ye en parlamentos como ésti onde mora la soberanía del pueblu, nesti casu, l'asturianu, onde mora la voluntá del conxuntu de la ciudadanía asturiana onde tenemos que manifestanos al respeutu, porque hai que xenerar opinión política”.

L'oxetivu, añedió, ye alzar la voz contra les “falcatrúes” de la industria farmacéutico. Un exemplu, foi'l de AstraZeneca que, recordó Zapico, namái apurrió nel desenvolvimientu de la so vacuna un 3 per cientu del capital total invertíu, asumiendo l'otru 97% la inversión pública. Y nun ye la única que se benefició d'esos apurros de los distintos Estaos.

Esta situación amuesa la necesidá de máxima tresparencia nos contratos pero, tamién, na lliberalización de les patentes que, defendió'l diputáu, “tienen que ser puestes al serviciu del interés xeneral. Tenemos qu'amás llograr una distribución de la vacuna a nivel mundial que sía global. Agora mesmu, “9 de cada diez dosis tánse inoculando nos países ricos”, daqué que, añedió, “pue ser peligroso pa nós mesmos porque surde con fuerza'l riesgu a nueves variantes”.

Tocantes a otres vacunes más allá de les yá aceptaes poles autoridaes, Zapico señaló qu'hai certidume de que, más tempranu que tarde, van ser puestes a disposición de países en víes de desenvolvimientu: “aportuno, una vegada más cola idea de la universalización de la vacuna”. Al pie de ello, toca tamién aumentar la inversión en cooperación internacional pa fortalecer los sistemes sanitarios nos países aprobetaos.