Menu

Vallina y Zapico denuncien la esclusión de la Comunidá de l'axenda política de prioridaes de Madrid, con midíes lesives en sectores estratéxicos como l'industrial, enerxéticu o agroganaderu, qu'esixen un pactu verde

IX va treslladar a la Ministra Yolanda Díaz les reivindicaciones d'Asturies frente a los agravios de les polítiques puestes en marcha dende Moncloa

Izquierda Xunida denunció güei la falta d'empatía del executivu central escontra Asturies, "abandonada" n'industria, enerxía o polítiques agraries, polo que pidió al Gobiernu asturianu que faiga frente al retu, coordinandose cola Xunta Xeneral y tamién colos Conceyos, empobinando, amás,esfuerzos pa llograr un pactu verde que dexe compaxinar la transición enerxética cola viabilidá económica del territoriu. La falta d'importancia de la Comunidá autónoma quedó de manifiestu la selmana pasada cuando una propuesta del Parlamentu Asturianu, defendida por IX, Podemos Asturies y la Federación Socialista Asturiana, quedó refugada pol Congresu de los diputaos onde los representantes nacionales de les trés fuerces votaron en clara contradicción colo que decidieren los diputaos y diputaes asturianes de los sos propios partíos.

La vocera d’IX Asturies, Ángela Vallina, y el diputáu y coordinador xeneral de la formación, Ovidio Zapico, esixeron un cambéu nesi faigo de menos qu'esclúi a Asturies de l'axenda política de prioridaes del Gobiernu Central.

"Asturies nun ta na axenda política del Gobiernu Estatal; precisamos tener una acción yá coordinada dende'l Parlamentu, el Gobiernu d'Asturies y tamién colos nuesos alcaldes, porque precisamos qu'Asturies tenga relevancia política como la tienen otres comunidaes y, máxime, cola situación d'urxencia que tien esta tierra nuesa", afirmó vallina.

"Esto hai que revertilo", enfatizó, pela so parte, Ovidio Zapico quien citó, amás de los sectores industriales, enerxéticu o agroganaderos, especialmente afectaos poles polítiques impuestes dende Madrid, lo relativo a los proyectos pindios y que se contemplen nel Pactu poles Infraestructures" que, añedió, tien de ser reeditáu p’afaelo a les necesidaes actuales, teniendo en cuenta yá les nueves amenaces que, como los peaxes sobro autopistes tienen de ser refugaos de forma unánime".

Y ye que, en materia de peaxes, la ciudadanía asturiana ye la que más tien que pagar de "tola cornisa cantábrica" pa poder conectase d'una forma rápida, segura, fluyida" col pandu central. Frente a polítiques fiscales que se traten de edulcorar baxu falses etiquetes "verdes", Ovidio Zapico amosó la so disposición a axustar un nuevu modelu impositivu que tien de tar basáu nun sistema fiscal social". L'oxetivu, señaló'l parllamentariu, ye que, tal que marca'l mandatu constitucional, contribuya más quien más tienen: "Fiscalidá progresiva en tou momentu y non copagos que, a última hora, xeneren desigualdaes y xeneren que la clase trabayadora siga sosteniendo col mesmu esfuerzu económicu, n'este caso infraestructures, qu'otres clases sociales más pudientes".

Pa Zapico, ye necesario qu'empicipie a desenvolvese un pactu pol financiamientu autonómico, p'alcordar el modelu de financiamientu del Estáu que tien d'incluyir l'harmonización fiscal. Amás, ye imprescindible llegar a un pactu verde". Asina, el coordinador xeneral d'IX refugó los cambeos, que pretenden impulsase "dexando tras" les necesidaes pa la so superviviencia de territorios y emplegos. "Hai qu'integrar nun discursu común polítiques agraries, ambientales ya industriales, porque la política ambiental solo vase a sostener dende un discursu previu de calter social. Tolo contrario va ser ecololliberalismu y nós cualquier conceutu que detrás traiga la palabra lliberalismu yá, de mano, va ponenos roceanos. Y eso ye lo que tamos viendo agora mesmu: una ministra que con ese ecololliberalismu como bandera afrella costantemente a Asturies y vanos a asitiar, de primeres, énte una perda evidente de población".

Frente a la fueya de ruta qu'impulsa la Ministra Teresa Ribera, Zapico contrapunxo'l compromisu anunciáu apocayá pola Ministra Yolanda Díaz, qu'aseguraba que pretendía Gobiernu con cambeos verdes y tecnolóxicos pa la mayoría social, impulsando una recuperación qu'ha ser xusta, qu'ha ser inclusiva, qu'ha ser, poques gracies, feminista y, a última hora, buscando un nuevu contratu social pa la xente. Neses palabres, IX d'Asturies siéntese perfectamente reflexada".

Les agresiones a Asturies quedaron de manifiestu en distintos ámbitos. L'alderique y la votación de la iniciativa pa la universalización del derechu a la salú pública ye, a xuiciu d'Ángela Vallina, “la gota qu'apina'l vasu", pero, sobremanera un exemplu de la nula atención de los gobiernos nacionales escontra la Comunidá Autónoma, tantu de los Gobiernos precedentes en Moncloa como del actual empezando, reconoció, pola nuesa mesma organización, que nun nos pide opinión nes temes que son fundamentales p'Asturies, como ye la industria". Polo pronto, IX va pidir una xunta cola Ministra Yolanda Díaz pa esponer la situación particular del sector industrial asturianu, pero, tamién, al tratase nestos momentos de la máxima referencia de Xuníes Podemos nel Executivu Central, del contestu xeneral de la comunidá autónoma.

Vallina amosó amás el so malestar pola posición del Gobiernu autonómicu no tocante al destín de los fondos pa la transición enerxética yá que, señaló, too apunta escontra un planteamientu de “monocultivu enerxéticu" que, al so xuiciu, nun ye fayadizu. "Suénanos bien mal que se diga que se van a crear 6.300 emplegos, o 3.600 emplegos pa 2025 y 6.300 al mediu plazu", señaló la diputada pa quien se ta cometiendo'l mesmu erru del pasáu, por culpa de que esos puestos de trabayu tán amestaos a la construcción y puesta en marcha de nueves instalaciones. "Depués, de verdá, los futuros emplegos d'esta rexón que va aprovechar cola transición van ser mínimos, cuidando qu’equí mesmu detallar onde dicen que va ser de caltenimientu los puestos que sían más estables: toos sabemos el personal que se precisa pa caltenimientu en ciertes estructures".

La vocera d'IX denunció lo que, na so opinión, ye "una manera de perder la oportunidá" de recuperar los emplegos perdíos na minería, nes térmiques y notros sectores, daqué que, aprofió, ye precisamente l'oxetivu d'estos fondos. "Si vamos tar no de siempre, crear puestos mientres dure la obra y, dempués, tenemos cuatro puestos de trabayu, creo que tamos desperdiciando l'oxetivu de lo que son los fondos de la transición".

Ángela Vallina foi tamién bien crítica col escasu aprovechamientu d'una ferramienta frutu del consensu como ye l'Alianza pola Industria. Nesi sentíu, responsabilizó al actual conseyeru d'Industria de balerar y desvirtuar lo que tendría de ser un elementu clave de sofitu pa esixir compromisos con Asturies, gracies a un respaldu que va más allá de lo político, al algamar tamién el restu de la sociedá, dende sindicatos, a la patronal. "El Presidente tien de pensar seriamente en si esta conseyería precisa un cambéu", reprochó la diputada quien denunció'l riesgu de qu'Asturies faiga mal les coses col costu de quedar marxinada.

"Creemos de que va siendo hora qu'esti Gobiernu y sobremanera esta Ministra, que paez que les tien tomaes con Asturies, esplíquenos, porque al meyor tamos d'alcuerdu, cuál ye'l modelu granible que tien en mente pal Estáu, pero que tien en mente p'Asturies". Asina, la parllamentaria criticó que de forma repitida tean tomándose midíes lesives pa la comunidá autónoma, yá na zona rural, yá na industrial, ensin esclariar escontra ónde pretende dise y con qué modelu granible. Ello ye que la pandemia dexó claro, señaló, que nun puede fiase al sector del turismu'l gruesu de la economía, yá que son precisamente los países más dependientes d'esti tipu d'economía quien más afectaos viéronse pola crisis sanitaria.