Menu

Ángela Vallina defende una iniciativa qu'asume los planteamientos de l'Alianza pola Industria y que cunta col sofitu de José Manuel Zapico y Javier Fernández Lanero, pa llograr que se pongan midíes qu'aseguren la competitividá d'un sector d'altu nivel d'emplegu, estable y calidable.

Izquierda Xunida presentó güei, col respaldu de Comisiones Obreres (CCOO) y la Unión Xeneral de Trabayadores (UXT), una propuesta de proposición de Llei pa declarar estratéxica la industria electrointensiva, que pretende sustanciarse nel mes de setiembre y que, de ser aprobada, supondría treslladar la iniciativa al Congresu de los Diputaos pal so discutiniu nel Parlamentu Nacional. La vocera d'IX, Ángela Vallina, acompañada polos secretarios xenerales de dambes centrales, José Manuel Zapico y Javier Fernández Lanero, xustificó güei la necesidá de garantizar un marcu xurídicu apropiáu pa garantizar la competitividá d'un sector imprescindible pa asegurar el futuru industrial d'Asturies y España.

"Lo que queremos ye que se declare por llei'l calter estratéxicu de la industria básico de bien altu consumu enerxéticu, la hiperelectrointensiva, n'Asturies y n'España. Falamos de consumos cimeros a los 500 Gigavatios hora como n'ARCELOR MITTAL o ASTURIANA DE CINC. Creemos que tienen de ser estratéxiques, por volume d'emplegu directu ya indirectu, pola calidá de los sos contratos y pol so impactu nel PIB asturianu o pola so capacidá pa destinar recursos n'I+D+i.", resaltó la diputada.

IX defendi, amás, l'accesu a beneficios alministrativos, fiscales y a los mecanismos d'accesu prioritariu y determinación de los precios enerxéticos que se van afitar nun nuevu Estatutu de la Industria de Bien Altu Consumu d'Enerxía Eléctrica; una regulación en materia de xestión del consumu y precios enerxéticos que, siendo compatible coles disposiciones de la Unión Europea, nun asitie a texíu industrial asturianu y español básicu en peores condiciones que les qu'esisten n'otros países de la zona; la compensación de los costos d'emisión indirecta de CO2 nel importe máximu dexáu pola Unión Europea; y la puesta en marcha de manera inmediata un mecanismu sustitutivu de la puya de interrumpibilidá. A última hora, resumió Ángela Vallina, "pidimos polítiques pa la competitividá del sector electrointensivo como les esistentes n'otros países de la UE".

Los secretarios xenerales de los dos centrales mayoritaries coincidieron na oportunidá d'una iniciativa cola que pretende blindase" el presente y el futuru d'Asturies, con midíes que dexen desaniciar l'agraviu comparativu" que, en palabres de José Manuel Zapico, sufren les empreses aniciaes nel territoriu asturianu y, poro, español. "Nun tamos pidiendo compensaciones , nin ayudes: tamos pidiendo igualdá d'oportunidaes para poder competir; que na mochila de les nueses empreses nun hai piedres para poder transitar o, meyor dichu, nun haya recibos de la lluz que nun se puedan pagar. Creemos qu'hai que llanzar un mensaxe de SOS".

Precisamente, respectu al costu eléctricu, Zapico foi especialmente críticu énte una situación na que reclamó l'acción del Executivu Central. "Ye conocíu y ye oxetivu, naide puede poner en dulda que l'Estatutu pa les empreses electrointensives qu'aprobó'l Gobiernu ye un estrueldosu fracasu; que nun da respuesta a los problemes de les empreses más altamente consumidores d'eletricidá y Pedro Sánchez debe de reconocelo pa poder empezar a buscar soluciones. Nun es puede siguir pagando'l preciu de la lluz a preciu d'oru. Nin la industria, nin les families".

Pal secretariu xeneral d'UXT, Javier Fernández Lanero, tán dándose pasos importantes pa rescatar el sector industrial asturianu y, gracies a les movilizaciones, yá se tán viendo delles meyores, como'l rescate de Duro Felguera o les inversiones anunciada n'Arcelor Mittal. "Ye'l momentu de pasar de los dichos a los fechos y equí ye un bon exemplu lo que ta faciendo Izquierda Xunida d'Asturies con esta propuesta de proposición de llei pa considerar la industria altamente intensivo en consumu eléctricu como estratéxica".

El planteamientu, enfatizó Fernández Lanero, ta dafechu xustificáu si quierse que la industria algame un pesu sobro'l Productu Interior Brutu -tal que defende la Unión Europea-. Pa ello, aprofió'l dirixente uxetista, "hai que poner de manera inmediata y urxente, y nun puede pasar más d'añu y mediu, en poner aranceles ambientales". Y ye que, añedió, nun tien sentíu plantegar una transición ecolóxica si, depués, caltiense la importación d'aceru puerco" de países que pueden producir per debaxo de preciu, con ayudes del estáu, o ensin pagar un solu euru por emitir CO2.

España, defendió'l líder de UGT Asturies, tien que definir un plan estratéxicu pola industria" que, matizó, tien de contemplar una especificidá per Asturies, dada la concentración na Comunidá Autónoma d'un gran númberu de multinacionales industriales, que xeneren muncho empléu. "Poro, esi pactu d'Estáu pola industria tien tamién que venir acompañáu por un pactu d'Estáu pola enerxía, con precios previsibles, con un suministru estable y precios competitivos similares a los qu'hai n'otros países de la Unión Europea".

Javier Fernández Lanero aseguró qu'el so sindicatu defende esta iniciativa d'IX porque les empreses hiperconsumidoras d'enerxía son "tractoras" que xeneren muncho emplegu, calidable y estable. "Amás, somos una comunidá industrial anque la propuesta se faiga pa toa España".

Na presentación, tanto Valina, como Zapico y Fernández Lanero, coincidieron en delles meyores importantes que se producieron en materia industrial, como la entrada de la SEPI en Duro Felguera o la multimillonaria inversión anunciada n'Arcelor. Esta postrera, aseguraron, ye una noticia bien importante, magar, esti apueste nun foi frutu de la casualidá sinón de la movilización, tanto sindical como política y na cai.