Menu

Ángela Vallina y Rafael Palacios denuncien la opacidá sobro un espectáculu que'l so procedimientu alministrativu incumple la llei, según la normativa de salú frente a la COVID19

Izquierda Xunida y Podemos Asturies esixeron güei al Gobiernu d'Asturies qu'asuma la so responsabilidá y torgue la celebración de la novillada prevista en Cangues d'Onís y que, sía que non, prohiba l'asistencia de menores d'edá, dando cumplimientu tantu a la llei contra la violencia a la infancia y l'adolescencia como a los encamientos de Naciones Xuníes a España sobro esti tipu d'espectáculos. El diputáu moráu, Rafael Palacios, y la vocera d'IX nel Parlamentu autonómicu, Ángela Vallina, criticó esta mañana tantu al Conceyu de Cangues como a l'Alministración Rexonal énte una actividá que nada tien que ver cola recuperación de festexos tradicionales y que, amás, ta entamándose con una total falta de tresparencia y ensin que, según denunciaron, esista l'espediente preceptivu que sería necesariu pa la so celebración.

Pa Palacios, hai una clara responsabilidá del Gobiernu d'Asturies ,al traviés de les Conseyeríes de Presidencia, de Cultura, Política Llingüística y Turismu, y de Derechos Sociales y Bienestar, que se suma a la del propiu Consistoriu. Asina, aseguró, "esiximos la suspensión fulminante de la novillada y faemos responsables a les autoridaes competentes de les consecuencies sanitaries o d'otru tipu que puedan asoceder pola celebración d'esta brutalidá".

Ángela Vallina, pela so parte, rellató la total irregularidá de la organización, siquier colos datos que se pudieron percanciar, por culpa de que l’Equipu de Gobiernu niega qu'esista siquier un espediente alministrativu. "Resúltame increíble qué, según el grupu municipal nuesu, en Comisión dízse-yos, lliteralmente, que nun esistía espediente: esto ye lo nunca visto. De primeres, tien qu'haber una solicitú de la empresa que la va a faer y qu’esa empresa tenga en riegla absolutamente tolos papeles, tolos permisos, toles obligaciones llegales; tien que tener un contratu col propietariu del suelu". Sicasí, nada dio a conocer un res sobro estos aspeutos y lo qu'esiste ye una total incertidume, inclusive, sobro'l llugar onde pretende realizase l'espectáculu. Nestos momentos, paez amás que s'empecipiaron movimientos de tierra del calce d'un ríu ensin que s'emitiera informe nengunu nin per parte del Conceyu nin, tampoco, de Confederación Hidrográfica.

"Ye un auténticu despropósitu, una auténtica illegalidá. Yo nun sé nin cómo l'Alcalde pue colingase d'esa manera, porque, si hai una esgraza ende, les responsabilidaes penales tán bien clares. Nun entiendo cómo'l Principáu ta mirando pa otru llau, incumpliendo la so propia llegalidá, la so propia normativa", enfatizó Ángela Vallina.

La vocera d'IX y el diputáu de Podemos reprocharon, tamién, la falta de protección énte la violencia a la infancia y l'adolescencia por culpa de que, esplicaron, non yá ye que se dexe'l so accesu a un espectáculu de maltratu animal, sinón que se fomenta: "son de baldre les entraes hasta los diez años, cola obligación de dir presencialmente colos sos padres pa recoyeles. Ye daqué que ye vergoñoso que teamos educando a los nuesos fíos y les nueses fíes, a la infancia, na violencia contra los animales y nel maltratu animal"

El próximu vienres, a les 12 hores convocóse una concentración frente al Conceyu de Cangues d'Onís que ye sofitada tanto por Podemos Asturies como por IX, según esplicaron Rafael Palacios y Ángela Vallina, pa quien ye imprescindible que, d'una vegada por toes, el Gobiernu asturianu asuma la so responsabilidá y suspenda la novillada, faciendo cumplir de forma estricta la mesma llegalidá de la que l'alministración ye la so máxima garante.