Menu

IX considera qu'hai que pasar del llaboratoriu d'idees a propuestes concretes pa la solución de problemes concretos" na Asturies balerada

Izquierda Xunida plantegó güei prescindir de la figura del Comisionáu pal Retu Demográficu. El diputáu y coordinador xeneral de la formación, Ovidio Zapico, apostó güei por pasar de elucubraciones teóriques a poner en marcha polítiques de calter prácticu que dexen dar respuestes a los problemes de l'Asturies Balerada. El parllamentariu quixo esclariar que nun pon en cuestión la valía intelectual de Jaime Izquierdo, actual comisionáu, sinón d'esta figura política" yá que, al so xuiciu, el planteamientu inicial pal que foi creada nun foi útil nestos dos años: "nun nos sirve, políticamente nun sirve y hai que reestructuralo pa pasar de ser un llaboratoriu d'idees a una fábrica de realidaes pa, a última hora, dar por zarráu esti ciclu de reflexón teórica, porque ta escosu".

Pa Zapico, "nun tamos pa perder muncho más tiempu con alderiques teóricos y, mire, señor Izquierdo (Jaime, Comisionado para'l Retu Demográficu), a esti grupu parlamentariu nun-y paez un drama la migración, siempres y cuando nun tea causada nin por probeza, nin por situaciones de desemplegu. Lo que sí nos paez un drama ye'l vaciamientu d'una parte bien importante d'Asturies, d'una parte bien importante del nuesu territoriu. Y tenemos qu'encetar esto, sí o sí, d'una forma definitiva". Y ye que, a xuiciu del dirixente d'IX, l'oxetivu del Comisionáu tenía de ser apurrir idees y "propuestes concretes pa la solución de problemes concretos", Sicasí, aportunó Zapico, nestos dos años nun cumplió con estes mires.

La superación d'esta figura pasa, a xuiciu del parllamentariu, pol impulsu a polítiques executives. “Emplazolos yá, nel senu del Gobiernu -y ta equí'l Vicepresidente (n'Alusión a Juan Cofiño)- a realizar esa reestructuración qu'impulse, de verdá, polítiques pa evitar que l'Asturies balerada siga acentuando los sos problemes, siga acentuando la so sangría demográfica, siga acentuando, a última hora, la perda de territoriu. IX nun ta dispuesta a arrenunciar a territoriu de la nuesa Comunidá Autónoma. Nun podemos dexanos el luxu d'arrenunciar nin a un metro cuadráu del nuesu territoriu. Y nun me refiero a alderiques maneros con otres Comunidaes Autónomes, non: refiérome a territoriu onde la xente pueda vivir y tenga derechu a trabayar. Vivir y trabayar nel territoriu, nesti casu nel territoriu rural".

Ovidio Zapico, mientres la Comisión especial sobro'l Retu Demográficu esbilló los problemes que vive acaldía la población de les zones rurales, que van dende los del tresporte escolar, comunicaciones o dificultaes pa poder llegar en tiempos razonables a un médicu de guardia. De la mesma, añedió'l diputáu, hai falles pa l'atención de la discapacidá. "Siguimos -llamentó- instalaos nel campu de les idees, nel campu de la disertación, nel campu de la reflexón teórica permanente".