Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

06/10/2021

IX propón una reforma 'fuerte' de la estructura sanitaria, empezando por Atención Primaria

Ángela Vallina sollerta de la necesidá de revisar los númerus clausus pa dar respuesta a les necesidaes de nuevos profesionales en salú, ensin arrenunciar a la excelencia na formación.

IX propunxo güei la reforma de la sanidá pública asturiana, con tomar de soluciones que dexen encarar los problemes estructurales d'Atención Primaria. La vocera d'IX, Ángela Vallina, destacó la "gran capacidá de respuesta" de la rede sanitaria y de los sos profesionales, pero sollertó d'una "sobrepresión" que supunxo l'escosamientu y estrés de les muyeres y los homes que s'encargaron de nuesa salú". Coles mesmes, afirmó la diputada, tratase de dar respuestes a problemes previos a la COVID19 y, tamién, a otros surdíos mientres la mesma.

"La sanidá asturiana ta nun momentu en que demanda decisiones polítiques de gran algame", señaló Vallina, que pidió al presidente, Adrián Barbón, que ponga en marcha un procesu de reforma fuerte de la estructura sanitaria".

Sía que non, IX considera imprescindible que les reformes empiecen por Atención Primaria, al tratase de la puerta d'entrada al sistema, y que ta xenerando un malestar creciente ente la ciudadanía. "El deterioru de la sanidá, si nun se fai daqué antes, va causar un deterioru de la percepción de la democracia y del sistema autonómicu. Pasemos de les palabres, a los fechos", sollertó Vallina.

Según la vocera d'IX, esti malestar puede testase nes redes sociales: "seguro qu'al traviés del so twitter tuvo conocencia d'un malestar creciente d'una ciudadanía enfastiada del modelu d'atención telefónica, por casu; toi convencida de qu'usté mesmu, o xente bien cercano, sufrió eses restricciones nel accesu presencial a los sos centros de salú, entá güei".

Y ye que, a xuiciu d'Ángela Vallina, los cambeos que se precisen tienen de dar respuesta a problemes anteriores a la crisis sanitaria. "Yá antes de la pandemia, Atención Primaria presentaba déficits que terminaben per refundiar a bona parte de la población a los servicios d'urxencies hospitalaries, énte la respuesta desaparente o les perllarges llistes d'espera pa poder aportar a un especialista. Esta situación ye entá más grave nel mediu rural, l'Asturies balerada. Nun territoriu con una menor densidá de servicios, les restricciones punxeron les coses entá más difíciles a una población, más avieyada, pa quien la sanidá ye entá más necesaria".

La diputada pidió que la Xunta Xeneral dexe de ser, especialmente nesti asuntu, "altavoz de les estratexes electorales" p'asitiase nel núcleu de resolvimientu de los problemes estructurales de la Comunidá. "Esto esixe lideralgu per parte del Gobiernu y de la mayoría parlamentaria y va demandar esfuerzu y compromisu de los axentes sociales qu'han de vese implicaos nesi analís. Ye más, precisamos la implicación de los principales axentes sociales na reforma, polo que pidimos que, xuntu al procesu parlamentariu, ábrase otru de diálogu social y profesional".

Volver

Compartir

2014 Izquierda Xunida d'Asturies - Política de privacidad - Política de cookies