Menu

La vocera d'IX intervien na Xunta Xeneral pa defender que la llingua puede ser un elementu de cohesión social al igual que "toa espresión cultural"

Izquierda Xunida fizo ayeri una esceición nes sos intervenciones parlamentaries, interviniendo nuna iniciativa que s'aldericaba na Xunta Xeneral a instancies de la ultraderecha. La puesta en cuestión de lo que pa la formación ye parte de los derechos de la ciudadanía asturiana fueron la base pa xustificar una contundente respuesta de la vocera parlamentaria, Ángela Vallina, a los planteamientos asturianófobos de VOX. "Saben ustedes qu'Izquierda Xunida nun intervien ante alderiques plantegaos pola estrema derecha, como yá diximos paeznos un erru dexar que puedan influyir na axenda política y parllamentaria. Sicasí, cuando la estrema derecha pretenda erosionar derechos civiles, si vamos pronuncianos", esplicó la diputada.

Pa Ángela Vallina, la falta d'entendimientu a un modelu d'oficialidá atenta ye lóxico porque "nun comparten que la sociedá sía atenta, esto ye, democrática. Nin más nin menos. Cáusa-yos un enorme refugu que la política puédase despolarizar porque la estrema derecha alimentase de la división y el clima belicosu d'una sociedá. Esmolez-yos que determinaes polítiques puedan camudar de fase y asitiase nuna zona d'entendimientu y valores compartíos".

Nesa batalla asitió IX los allugamientos de VOX, qu'utiliza l'asturianu "como preséu pa la confrontación", al igual que, añedió, "utilicen otres polítiques, siendo la más miserable l'usu de la violencia contra les muyeres. Ye la mesma estrema derecha de los años 20".

Ángela Vallina trató d'esplicar de qué se fala cuando se plantega l'amabilidá: "la oficialidá del asturianu xúnenos como lo fai toa espresión cultural. Xune a quien lo fala con quien decide nun faelo, porque los iguala en derechos y la equidad ye cohesionadora. La oficialidá va siguir el desenvolvimientu marcáu pol Tribunal Constitucional y nun hai na más amable qu'una constitución democrática, en que la so xénesis nun tuvo la estrema derecha. Y va ser un modelu de máxima voluntariedá pa los empresarios, pal mundu del trabayu, pa la vida cívica, y equí ta la tercer nota d'amabilidá".

Frente a la medrana a imposiciones unillaterales, la parllamentaria señaló que pal desenvolvimientu de la Llei de promoción riquiráse una mayoría peramplia (3/5), pa garantizar la protección de los derechos de quien nun comparten la oficialidá. Esta ye, enfatizó, "una nota que podría entendese como "amabilidá procedimental". La Oficialidá atenta ye la que se constrúi inclusive con aquellos que nun creen nella".

IX defendió un modelu llingüísticu propiu y bien democráticu d'oficialidá que va suponer asitiar al asturianu fora de la polarización política y convertilo nun valor qu'impulse a Asturies como comunidá política. "L'asturianu ye una fonte de riqueza cívica y económica, como por cierto yá recueye la Llei d'Usu que nun ye aldericada pola derecha democrática. Esa Llei ye nexu d'unión pa influyir nel modelu amable d'oficialidá, esa Llei trescala'l nuesu planteamientu d'ordenación futura. Amabilidá ye entender que ye indispensable la voz discrepante, por eso'l filofascismu nun entiende nada. Asina se constrúi la sociedá y el nuesu partíu saber dende 1956. Esta manera de construyir expele a los totalitarismos, a los retrocesos históricos, a aquellos qu'al traviés de la intolerancia son namá llacayos de los grandes intereses privaos que deseyen una sociedá de súbditos y non de ciudadanía, qu'eso ye lo que significa esti derechu a la llingua, más ciudadanía".