Menu

Ángela Vallina destaca qu'IX, en solitariu, llogró desbloquiar un procesu paralizáu dende va meses, que la so primer meta va ser el 1 de febreru p'alzar a la Xunta un alcuerdu que dexe arrincar la tramitación

La negociación pa reactivar el procesu de reforma estatutaria sobro la oficialidá va abrir de nuevu la selmana próxima, dempués d'un parón de meses. La propuesta d'IX d'habilitar xineru na Xunta Xeneral como mes útil sirvió p'arrincar un compromisu que va llevar a sentase a los partíos que, en teoría, sofiten alzar l'asturianu al mesmu nivel de derechos que'l castellán. La vocera d'IX, Ángela Vallina, amosaba'l so prestu pol desenroque llográu por "Izquierda Xunida en solitariu".

Ello ye que tres meses de declaraciones a medios pero ensin nengún calendariu de xuntes previstu, güei, a lo último plantégase la primer xunta pa la próxima selmana ente los grupos a favor de la oficialidá. L'oxetivu, aportunó Vallina, tien que ser llograr que la reforma pueda llevase en "tiempu y forma" pa la so aprobación tanto na Xunta Xeneral como nel Congresu. "La selmana que vien va haber yá xunta de mano a trabayar sobro esta tema. Vamos Tar tol mes por que a día 1 de febreru entre la propuesta alcanzada, esperemos, col alcuerdu de los que tamos a favor, y llegemos a tiempu pa tener oficialidá".