Menu

Ángela Vallina carga contra la "nefasta" xestión del Conseyeru d'Industria al que reprocha tar "ausente" y ser "invisible" na política industrial asturiana

Izquierda Xunida pidió güei al Gobiernu d'Asturies qu'esixa al Executivu Central la implicación del Estáu pa garantizar viabilidá, actividá y emplegu na planta de l'antigua Alcoa d'Avilés. La vocera de la formación, Ángela Vallina, cargó esta mañana contra'l conseyeru d'Industria, Enrique Fernández, por una xestión al frente del departamentu ensin capacidá pa dar respuestes a los retos del sector industrial. "Asturies y el conseyeru d'Industria nun pueden permanecer impasibles énte la nueva tropelía que se ta cometiendo na antigua Alcoa. La verdá ye qu'Enrique Fernández ta ausente y, hai que dicilo claramente, porque, una vegada más, en cuenta de formar parte de les soluciones ta demostrando ser un problema qu'afecta tamién a la credibilidá del propiu Gobiernu".

Pa Vallina, la situación d’Alcoa y la falta de respuestes nun puede ser encetada pol Principáu como una sorpresa. Otra manera, señaló que va ser un zarru anunciáu, polo que ye imprescindible qu'Asturies esixa en Madrid la implicación de l'Alministración Central, al traviés de la SEPI o per cualesquier otra vía que garantice, dende los medios públicos, el futuru de la planta d'Avilés, de la so actividá y del emplegu. "Esti conseyeru nun puede siguir siendo invisible na política industrial asturiana o dedicándose, sólamente, a ciertes temes na industria. Creo que ye'l so llabor nefastu y yá va siendo hora de que'l Gobiernu tome midíes".