Menu

Zapico alvierte qu'IX nun va callar" frente a la presión de los cárteles de macro granxes y llamenta que "otros" se pleguen a elles, "instalaos nuna lóxica d'un mercáu que ye perversu"

El diputáu y coordinador xeneral d'IX cargó hai malpenes unos minutos contra'l presidente del Principáu, Adrián Barbón, al asitiase al pie de los grandes lobbies cárnicos, que la so actividá ataca directamente a les ganaderíes tradicionales asturianes y españoles, al imponer un modelu granible que tira precios a mariña del mediu ambiente, el bienestar animal y la calidá final. Ello ye que les declaraciones del xefe del executivu asturianu causaron "sorpresa", por inesperaes, teniendo en cuenta que'l ministru Garzón, defende, precisamente, el modelu granible estensivu, sostenible y calidable, tal que se desenvuelve na Comunidá Autónoma. "Alberto Garzón amenó un alderique que fadia, y enforma, a los lobbies de los cárteles económicos del sector y, énte eso, yo creo que nun caben posiciones de debilidá per parte d'aquellos qu'aspiramos a un nuevu modelu non yá namá económicu y social, sinón, tamién, de producción agraria basada nel modelu tradicional estensivu que ye'l que tien la nuesa Comunidá".

Pa Zapico, alliniase con quien traten de despintar l'impactu negativu de la ganadería intensiva, amazcarando sol paragües de los modelos sostenibles que nun tán en cuestión, nun ye, en nengún casu, beneficiosu pa les esplotaciones tradicionales. "Flacu favor faemos a tolos ganaderos d'Asturies, a los d'occidente, a los del centru y a los d'oriente, poniendo en tela de xuiciu les valoraciones y les duldes qu'Alberto Garzón Amena col modelu intensivu frente al modelu tradicional nuesu y poco, a última hora, tamos apurriendo a la nuesa ganadería poniendo en dulda les declaraciones del Ministru".

El coordinador xeneral d'IX quixo mandar un mensaxe claru: "que naide se confunda, y si tamos nun Gobiernu de coalición, si dende IX tamos nun Gobiernu de coalición, si hai comunistes nun Gobiernu de coalición, estos nunca van callar ante les presiones de lobbies. Otros sí paecen plegase a elles y sí paecen tar más cómodos instalaos nuna lóxica d'un mercáu que ye perversu y que, amás, sabemos que, tocantes a los modelos de carne, son dañibles pal planeta, nun respeten pa nada el bienestar animal, xeneren un productu de mala calidá, tiren los precios del mercáu y nun tienen repercusión dalguna nel mediu rural. Tou lo contrario de lo que supon la nuesa ganadería".