Menu

El proyectu y l'allugamientu tendrán de ser presentaos na Cámara antes de fin d'añu

La Xunta Xeneral aprobó güei la moción d'IX pa la unificación de les sedes xudiciales n'Uviéu. La vocera parlamentaria, Ángela Vallina, defendió la necesidá d'una reordenación que sirva tanto p'ameyorar la calidá na atención a la ciudadanía como la operatividá d'un serviciu básicu como ye'l de la xusticia.

La iniciativa, qu'incorporó dos tales enmiendes de PP y PSOE, dambes nel mesmu sentíu, pa desligar esi proyectu del plan d'usos pa los antiguos terrenes del antiguu Hospital Central nel Cristu. Sía que non, la moción pretende que l'executivu asturianu presente, antes de fin d'añu una propuesta definitiva d'allugamientu, según la inversión prevista y un calendariu d'execución.

"Lo que pidimos, nin más nin menos, ye que'l Gobiernu d'Asturies preséntenos nesta Cámara una propuesta pa la unificación de les sedes xudiciales d'Uviéu antes de final d'añu. Esa propuesta lóxicamente tendrá de contener tanto l'allugamientu definitivu de la nueva see xudicial como la inversión necesaria pa llevala a cabu y un calendariu pa la so execución", esplicó Vallina..

IX, primeramente, plantegaba qu'esi allugamientu plantegarase nel marcu d'actuación nel Cristu, magar, finalmente, nun s'incluyó nel testu definitivamente aprobáu esi espresu trezu.

La moción llegó tres años ensin que se respuenda nin a les necesidaes de xudiciales nin a les de la rexeneración del barriu oventense del Cristu. Sía que non, Vallina xustificó la iniciativa énte la dispersión de les instalaciones xudiciales: "n'Uviéu, les sos distintes sedes xudiciales tean esvalixaes hasta en seis allugamientos distintos y distantes", señaló la diputada, añediendo qu'esa separación nun contribúi a la calidá d'esi serviciu. "Y por enforma qu'agora haya quien lo fíe too a la eficiencia de les nueves tecnoloxíes, la presencialidá ye una condición de la prestación del serviciu públicu de la xusticia", aseguró.

La vocera d'IX esplicó que se trata d'un problema vieyu. Ello ye que yá se falaba d'ello va venti años cuando entró en serviciu'l Palaciu de Xusticia d'Uviéu y tamién se detectó como una de les debilidaes cuando Asturies asumió la competencia de Xusticia va quince años.

Na actualidá, esplicó Vallina, hai un estudiu del Colexu d'Arquiteutos d'Asturies sobro esta cuestión que lleva meses enriba de la mesa de la Conseyería de la Presidencia. "Poro, nun esiste nenguna razón por que la solución definitiva nun pueda tomase nos meses que queden d'equí a final d'añu. Y por eso precisamente támos pidiendo-y al Gobiernu que la tome y que nos la cunte, a esta Cámara y al conxuntu de la ciudadanía".