José Guido esixe seguridá xurídica yá que si la iniciativa nun respuende a los criterios de la llínea de subvención va ser el Conceyu quien tendrá d'asumir el costu.
Izquierda Xunida va preguntar al Gobiernu d'Asturies sobro'l proyectu “Recuperación de zones degradaes del conceyu de Sobrescobiu pa la so valorización agroforestal”, pero que, en realidá, contempla la conversión d'esti espaciu nun camping. El voceru municipal, José Guido amosó la so esmolición énte les consecuencies que podríen derivase pal conceyu si nun se cumple de forma escrupulosa coles bases de la convocatoria, una llínea d'ayudes derivaes de los fondos destinaos a zones afectaes pola transición enerxética, nel marcu del Plan de Recuperación, Tresformamientu y Resiliencia.
“Nun valoramos el proyectu como tal, sinón que nos esmolez que se forzara'l mesmu y que cola inversión yá fecha nun se reciban los fondos; eso puede pasar si nel procesu de xestión los controles financieros europeos conclúin que nun se tán destinando pa los fines de la convocatoria. Podemos atopanos con unes inversiones que nos dicen que van ser costeaes pola Unión Europea pero que pueden terminar siendo a cuenta de los mesmos vecinos y vecines”, esplicó Guido.
El conceyal refugó les crítiques del Alcalde, Marcelino Martínez, pa quien les duldes d'IX escuenden un enfotu obstruccionista: “equí nun hai nengún tipu de obstruccionismu, sinón una llabor responsable d'oposición, porque si a la fin nun se cumplen coles esixencies europees va haber que devolver les ayudes. Como oposición el nuesu llabor tien que se fiscalizar la xestión del Gobiernu local coles mires de defender los intereses de los vecinos y vecines. Y eso ye lo único que tamos faciendo”.
La duldes sobro la idoneidá del proyectu surden por cuanto que les finques nes que pretende construyise el camping nun presenten nengún tipu de degradación ambiental, lo que yá de por sí supondría un elementu de mala xustificación si s'atienden a les bases de les ayudes coles que pretende financiase.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies