Menu

Ángela Vallina defende un rellanzamientu del sector industrial como pasu imprescindible pa revertir l'esbarrumbe demográficu

La formación reivindica una reforma de l'Alministración que perita lluchar contra la burocracia en materia social como prioridá

Izquierda Xunida aprovechó güei la ufierta d'una “axenda del cambéu ufiertada ayeri pol presidente d'Asturies, Adrián Barbón, pa reclamar un cambéu d'axenda” nes prioridaes del Gobiernu d'Asturies, que dexe fondiar nel centru de la política gubernamental “el corazón industrial”. Ensin ello, sollertó la vocera de la formación, Ángela Vallina, “nun va haber cambéu demográficu”, polo que reclamó la convocatoria inmediata de l'Alianza pola Industria cola fin de reorientar l'acción del executivu nesta materia, pero, tamién, pa resituar el control de los fondos europeos.

Asturies, pidió la vocera d'IX, tien d'encarar la reforma de l'alministración, empezando polos servicios sociales y allixerando, ende de forma prioritaria, la burocracia. Con esti fin, Vallina, pidió a Barbón qu'acepte la propuesta de llei pa convertir la declaración responsable nel métodu habitual de solicitú de les ayudes sociales.

“Nun ye aceptable, nun ye ético y nun ye posible que miles de solicitantes de les ayudes pal arriendu de vivienda dependientes del so Gobiernu, miles, lleven esperando añu y medio pa saber si van recibir o non, y tean cola espada de Damocles de si van promover contra ellos xuicios de desahuciu por nun poder pagar l'arriendu o nun van poder pagar la lluz y la calefacción. Esa ye una burocracia inaceptable porque afecta a la vida de les persones más vulnerables”.

Frente a los mensaxes catastrofistas, enfatizó Ángela Vallina, “creemos qu'hai motivos pa la esperanza, pero pa ello tamién ye imprescindible la capacidá d'analís, reconocencia de los erros y de la negociación con otres fuerces progresistes pa reorientar l'esfuerzu políticu”.

Y nesos cambeos necesarios, la diputada defendió la necesidá d'encontiar el sistema educativu y el sanitariu. Nesti sentíu, criticó l'apertura d'un nuevu hospital priváu en Xixón que, al so xuiciu, ye posible, precisamente, pol deterioru de la sanidá pública.

Nesti últimu alderique d'orientación, los grandes oxetivos colos qu'arrincó'l Gobiernu la so andadura, siguen pindios, afirmó Vallina, pa quien la llexislatura podría calificase de malograda o fallida, una y bones les grandes temes queden pindies, ente elles tamién la de la fiscalidá, pa lo que reclamó un estudiu que dexe llograr un modelu equitativu y progresivu. Frente a rebaxes fiscales, que torgaríen caltener un Estáu de Bienestar fuerte, Vallina defendió que s'esquicen tributos como la “ecotasa”, al igual que yá asocede notres comunidaes autónomes y que tendría de revertir nel mesmu sector turísticu.

Nesta fin de llexislatura, Ángela Vallina pidió un compromisu firme pa revertir el retrocesu en materia d'igualdá que se rexistró dende 2014 a l'actualidá. Naquel añu, el tiempu que s'envaloraba pa consiguir la igualdá efectiva yera de 96 años; nestos momentos, esi horizonte temporal triplicóse.

IX reivindicó, amás, la necesidá de midíes y alcuerdos que vaigan más allá de la llexislatura pa poder siguir, tres les elecciones, con un procesu de cambeos que sirvan pa recuperar el pulsu de la economía asturiana y revertir l'esbarrumbe demográficu.

Nel alderique, Ángela Vallina, quixo tamién faer una mención a la guerra d'Ucrania, denunciando que nun se trata d'un conflictu nin pola democracia, nin les llibertaes, nin los derechos humanos, sinón por intereses espurios” d'unos pocos. Nun tien qu'estrañar, aseguró la diputada, “porque la Unión Europea nun foi precisamente nos últimos años una garantía de defensa de la democracia nin de protección de los derechos humanos nin nel norte d'África, nin en Arabia nin Afganistán. Inclusive sofitó a países que son campeonos en frayar derechos elementales, incluyendo'l derechu a la vida de munches neñes y neños palestinos. Tamos ante una guerra inmoral, que ta acabando cola vida de miles de persones n'Ucrania, pero que se ta llevando per delantre'l bienestar y el futuru de les clases medies y trabayadores del nuesu país, y d'otros munchos, a cuenta d'engordar de manera obscena los beneficios de les petroleres, de les eléctriques y agora tamién de los bancos. Esta guerra ta sirviendo pa xustificar lo que la izquierda siempres consideró inxustificable: la crecedera de la industria armamentista, la medría del gastu militar, el belicismu na orientación de la política internacional”.