Menu

Ángela Vallina y Adrián Barbón coinciden en qu'hai un eleváu grau de cumplimientu del alcuerdu robláu en 2019

Izquierda Xunida y FSA-PSOE analizaron esta mañana, en Navia, el grau de cumplimientu del pactu de investidura, no que yá ye la etapa final de investidura. L'oxetivu, analizar les materies pindies pa poder avanzar nestos meses finales, pero, tamién, cola vista puesta más allá de mayu de 2023. Dambes fuerces coincidieron nun cumplimientu eleváu del alcuerdu, más teniendo en cuenta los factores imprevistos de la pandemia de la COVID19 y, agora, de la guerra d'Ucrania. El bon entendimientu, tantu a xuiciu de la vocera d'IX, Ángela Vallina, como del propiu presidente d'Asturies y secretariu xeneral de la FSA-PSOE, Adrián Barbón, sirvieron como garantía de "estabilidá", indispensable no que la diputada calificó como "llexislatura complicada".

La elección de Navia pa esta xunta, señaló Vallina, nun foi al azar, sinón como un exemplu del bon entendimientu. "Faise en Navia porque cogobernamos ensin nengún problema y yo creo que se ta dando exemplu de cómo se tienen que faer les coses y cómo llegar a consensos: trabayar en favor de la ciudadanía, sía del to conceyu sía de toa Asturies".

La vocera d'IX esplicó que tamién hubo y hai desencuentros. Sicasí, defendió que ye imprescindible "saber xestionar les diferencies, saber falales y saber respetar los alcuerdos a pesar de tener diferencies en ciertos asuntos".

Pa Vallina, la estabilidá cómo un valor a destacar, especialmente, dixo, "si echámos un güeyu a lo que ta pasando nel panorama políticu con tolos partíos nesti Parlamentu rexonal, y n'Asturies, hai dos fuerces polítiques que naide puede negar que tán trabayando nos alcuerdos que roblaron, que tán trabayando, a pesar de diferencies, siguir trabayando a favor de la ciudadanía y que somos los que tamos dando estabilidá a la política asturiana y a la ciudadanía asturiana mientres otros tán parolando y enfrentándose, bien nerviosos yá pola dómina na qu'empiecen y poles dificultaes que tien esos partíos, unos a puntu de sumir y otros colos sos problemes de candidatures.

Frente a les esmoliciones partidistes, la vocera d’IX Asturies reivindicó caltener el pulsu del trabayu pa encetar los problemes que siguen esistiendo y que tán enriba de la mesa. "Escuéyennos pa gobernar 4 años, non trés y mediu. Y eso ye lo que tenemos que faer, trabayar hasta l'últimu día y devolver esi enfotu a la ciudadanía na política que dalgunos y dalgunes tán empeñaos en destruyir, en dicir que la política nun vale pa nada o que too ye una porquería: non, la política ye l'arte de faer les coses y les coses imposibles munches vegaes; y la política hai que faela con dignidá, con honradez, con tresparencia y sabiendo xestionar los desalcuerdos. Y eso ye lo que tamos faciendo IX y el Partíu Socialista".

Al respective de los desalcuerdos de llexislatura, que llevaron a IX a refiertar al Conseyeru d'Industria, o, anguaño, a refugar la Llei calidable ambiental, Ángela Vallina señaló que ye indispensable saber encarar eses diferencies que namá van poder resolvese "falando, con diálogu y depués, lóxicamente, naide puede pidir que síamos ximielgos; por eso somos dos partíos distintos, sinón taríamos toos militando nel mesmu partíu. Lo fundamental ye'l consensu, llimar aspereces y va haber momentos en que nun teamos d'alcuerdu, pero non por eso vamos montar unes engarradiella y a dexar de dar estabilidá a la ciudadanía que ye lo que tenemos que faer. Ye a eso cuando me refiero a xestionar diferencies.

Presupuestos

L'alcuentru va ser el preámbulu pa encetar, la selmana próxima, la negociación presupuestaria, que llega, según el Presidente cola disposición" a llegar a alcuerdos. Na xunta participaron tamién la secretaria d'organización del PSOE, Gimena Llamedo, la vocera parlamentaria socialista, Dolores Carcedo, y el diputáu y coordinador xeneral de IU Asturies, Ovidio Zapico.

Duro Felguera: non a la perda d'empléu

Barbón y Vallina coincidieron tamién nel refugu a la perda d'empléu anunciada por Duro Felguera. El Presidente aseguró que la "minoración" d'empléu ye refugada de planu pol so Gobiernu nun analís que tamién foi compartíu por Ángela Vallina