Menu

Ángela Vallina defendió la iniciativa como una respuesta a los ataques "ensin precedentes" del alcalde de la capital, Alfredo Canteli a la institución académica.

Izquierda Xunida llogró güei l'aprobación d'una Proposición non de Llei en defensa de l'autonomía de la Universidá d'Uviéu, en respuesta a los ataques recibíos nes últimes selmanes pola institución académica, convertida na diana de los exabruptos del alcalde de la capital, Alfredo Canteli. La iniciativa salió adelantre col sofitu d'IX, PSOE, Podemos y un diputáu de Foru, l'astención del únicu parllamentariu del Grupu Mistu y el refugu de la derecha y l'ultraderecha (PP, VOX y Ciudadanos), xuntu al otru diputáu de Foru. La vocera parlamentaria, Ángela Vallina, defendió la iniciativa tres lo que denominó como "campaña consciente y orquestada" pol rexidor y que'l so propósitu nun yera otru que'l desprestixu de la institución educativa y de los sos órganos de gobiernu.

Con esta PNl, la Xunta encamienta al Conseyu de Gobiernu a utilizar tolos medios al so algame pa garantizar a la Universidá d'Uviéu'l so derechu fundamental a l'autonomía, refugando los ataques y los intentos de deslegitimación que ta sufriendo y que provienen principalmente de responsables políticos del equipu de gobiernu del Conceyu d'Uviéu.

Amás, llamar al Executivu asturianu a facilitar la execución de les decisiones que, nel so ámbitu de competencies, tome la Universidá, incluyíos los que se refieran al allugamientu de les sos distintes facultaes y escueles universitaries. Finalmente, reclámase que dende'l Principáu se puea esixir a toles instituciones y organismos públicos, y más allá de la espresión de lexítimes discrepancies, caltengan, sicasí, el respetu por cuenta de la Universidá d'Uviéu y los sos distintos órganos de gobiernu y participación.

Ángela Vallina xustificó la oportunidá de la propuesta ante una campaña que, al so xuiciu, "nun tien precedentes nin tocantes a la so intensidá, algamando unos niveles d'agresividá desconocíos, llegando al insultu personal, nin tocantes a los sos oxetivos, que van más allá del alderique sobre l'allugamientu más conveniente d'unos determinaos estudios y que cuestionen la llexitimidá de los órganos de gobiernu de la Universidá". Y ye que, anque nel pasáu tamién hubo airaos alderiques pol meyor o peor allugamientu de determinaes facultaes, "nunca enxamás produxérase una campaña impulsada dende un conceyu pa quebrar la voluntá institucionalmente espresada de los órganos de gobiernu de la Universidá d'Uviéu y tratar de revertir les sos decisiones, utilizando como sida la defensa de la ciudá. Sicasí y parafrasiando al alcalde, l'interés d'Uviéu, l'auténticu interés de la ciudá ye l'interés d'Asturies de la que ye capital y de la nuesa Universidá."

Pa Izquierda Xunida d'Asturies, la Universidá tien que ser un vector esencial nel desenvolvimientu de la nuesa Comunidá Autónoma, polo que la posición del alcalde Canteli y el so equipu de Gobiernu, en palabres de Vallina, "nun ye namái desatamañada y esaxerada" sinón esencialmente "intolerable" porque desconoz que la Universidá d'Uviéu se autogobierna por derechu propiu.