Menu

Ánglea Vallina reclama al Gobiernu que defina la capacidá de carga pa esti tipu d'instalaciones nel territoriu y denuncia que, namái pal occidente hai planes de bombeos, bateríes y otres tecnoloxíes complementaries, en munchos casos, amestaes a la espansión eólica

Izquierda Xunida sollertó güei de los posibles efectos negativos, especialmente pal occidente d'Asturies, de los proyectos "envueltos nel celofán" de les enerxíes llimpies. La vocera de la formación, Ángela Vallina, esixó al Gobiernu que d'una vegada por toes póngase a la cabeza con una planificación que dexe ordenar la proliferación d'esti tipu d'instalaciones, y el diálogu con vecinos y vecines pa tener en cuenta la so opinión nuna materia que va marcar el futuru d'estes contornes.

Vallina recordó que yá nel Plenu pasáu reclamara información sobro la implantación de parques eólicos nuna zona del occidente d'Asturies, precisamente por una crecedera esponencial d'esti tipu d'instalaciones que, agora, vense reforzaes con otru tipu de proyetos igualmente venceyaos a les enerxíes anovables y que vuelven poner el focu na compatibilidá ente'l desenvolvimientu de nuevos sistemes de xeneración eléctrica y les actividaes complementaries d'esos sistemes y la protección del mediu ambiente, el respetu a la opinión de la población afectada y el caltenimientu de les actividaes económiques tradicionales. Esiste esmolición y nun ye pa menos, con12 planes de bombeos, bateríes y otres tecnoloxíes complementaries y que, en munchos casos, tienen que ver cola espansión eólica prevista nel occidente d'Asturies. "Paez qu'esos proyectos van volvese a concentrar tamién nel occidente. Nun-y va estrañar, por tanto, señor Conseyeru, que sía precisamente la población d'esa parte d'Asturies la que tea más esmolecida. Y esa parte de la población, conseyeru, nun dexa de preguntar por qué les grandes ciudaes españoles que son les que más enerxía peracaben nun tienen nin se-yos espera nenguna gran infraestructura enerxética y nós tenemos qu'enllenar los nuesos montes y mariñes d'aeroxeneradores, banzaos y demás elementos".

La incertidume, señaló la vocera d'IX, guarda estrecha relación cola indefinición del Gobiernu, que nun paez que tenga una planificación de la capacidá de xeneración enerxética, nin de les fontes de producción d'esa enerxía que se pueden y, sobremanera, quieren enllantase, según los llugares más fayadizos pa faelo, sinón que, reprochó, "too paez que pretende dexase al únicu albur de la iniciativa privada pa decidir qué se va a instalar, onde, y el cómo y el cuándo".

El malestar de de la ciudadanía, esplicó Vallina, tamién s'esplica porque esos proyectos envueltos nel celofán de les enerxíes llimpies o enerxíes verdes", nun van suponer un impactu significativu na creación d'emplegu na zona nin, tampoco, paez que vengan acompañaos d'otros proyectos de desenvolvimientu d'I+D+I que xeneren riqueza neses contornes. Frente a ello, hai enfatizado la diputada, "nel meyor de los casos van ser proyectos neutros y nel peor pueden ser iniciatives que pongan en riesgu non yá la calidá de vida de los habitantes de los llugares nos que s'enllanten sinón les posibilidaes de desenvolvimientu económicu d'eses zones que sí creen emplegu como'l sector primariu o'l turismu rural, ente otres".

Ángela Vallina aportunó na necesidá d'impulsar la planificación y diálogu, per un sitiu, por que sía el gobiernu d'Asturies el que determine cuál ye la capacidá de carga real que tien el territoriu pal desenvolvimientu de proyectos d'enerxíes anovables, lo mesmo que de les actividaes de respaldu y almacenamientu venceyaes a los mesmos y, por otru, pa pulsiar, con vecinos y vecines y les entidaes sociales d'eses zones, qué opinen y asina poder tener en cuenta eses opiniones. Si non, concluyó la parllamentaria, "el desenvolvimientu d'eses enerxíes va convertir nun grave problema políticu y social".