Menu

Ovidio Zapico sollerta de que les compensaciones anunciaes pol Gobiernu central pal sector pesqueru supón una reconocencia de afectaciones "severes" nes cales

El diputáu y coordinador xeneral d’IX Asturies, Ovidio Zapico, sollertó güei del riesgu pal sector pesqueru d'Asturies de los eólicos marinos previstos nes mariñes de la comunidá, polo qu'anunció que va pidir la derogación de los Planes d'Ordenación del Espaciu Marítimu (POEM) y l'establecimientu d'una moratoria en materia enerxético de vientu en tierra y mar. El parllamentariu, nuna intervención esta mañana nel Plenu de la Xunta Xeneral, aseguró que l'anunciu de la ministra del ramu de "compensaciones" ye un motivu claru d'alarma, por culpa de que supon una reconocencia de que los proyectos de xeneración eléctrica con molinos de vientu nel mar afecten a les cales. Y ye que'l planteamientu, según Zapico, "da a entender que, efectivamente va haber unes afecciones severes a la so actividá".

El líder d'IX amosó tamién la so esmolición pola falta de interlocución col sector pesqueru, según tán denunciando les mesmes Confreríes de pescadores.

Frente a esta incertidume, Ovidio Zapico, pidió al conseyeru un mensaxe de "tranquilidá", tantu pa garantizar los intereses del sector pesqueru, pero tamién al respective de la necesidá d'una planificación, articulada conforme a un equilibriu sostenible" ente la ufierta y la demanda y que nun se dirá a procesos como'l que yá pasó notros proyectos enerxéticos d'Asturies. Nesti sentíu, preguntóse si esta proliferación de torres ensin nengún tipu de planificación va terminar con un modelu fallíu, como asocedió nel so día cola llínea d'alta tensión Lada-Velilla, qu'agora va empezar a desmontase tres 40 años de la so construcción ensin que nun llegara nunca a tresportar nin un megavatiu.

Ovidio Zapico aportunó güei nel compromisu d'IX na llucha contra'l cambéu climáticu y los alcuerdos de París. Eso sí, esos cambeos tienen de ser executaos con criterios de equidad y xusticia territorial y evitando que s'afecten sectores clave non yá dende la perspectiva del empléu y la diversidá granible d'Asturies, sinón tamién p'asegurar la soberanía alimentaria.

Pa Ovidio Zapico, ye imprescindible que los grupos de la derecha, qu'agora s'asitien frente a los eólicos esixendo planificación y el respetu a los sectores tradicionales, amuesen les sos cartes más allá de declaraciones. Nesti sentíu, anunció que va llevar delles iniciatives a la Cámara na que tolos partíos van deber asitiales: "yo tamién quiero ver determinaos grupos de la derecha, más allá d'estos rumbos de confrontación que faen con usté equí, hasta ónde tán dispuestos a llegar nos planteamientos, hasta onde tán dispuestos, a última hora, a tomar partíu, a moyase". Asina, el diputáu defendió la necesidá d'encetar l'alderique de les anovables, con planificación pública, pero amás dientro d'un planteamientu xustu colos territorios, coles persones, cola clase trabayadora y les actividaes tradicionales como pueda ser la ganadería o'l sector pesqueru. Al pie de ello, Zapico reivindicó procesos "garantistes". Sía que non, concluyó, "énte la situación d'alarma y d'esmolición que ta xenerando los POEM no que se refier a les nueses agües marítimes, el planteamientu del mio grupu parlamentariu ye que se deroguen. Y yo nun creo qu'esto sía una irresponsabilidá, que-y lo oyí a usté esta mañana. Yo más bien creo qu’una irresponsabildad agora mesmu ye avanzar a un ritmu percima de les posibilidaes que puedan poner en riesgo actividad tradicionales como'l sector pesqueru".