Menu

Ángela Vallina reconoz les dificultaes d'estos cuatro años, pero reprocha que sigan ensin respuesta aspectos clave p'asegurar el bienestar de la ciudadanía, la cultura asturiana y el desenvolvimientu sostenible.

La falta de soluciones pa rede de 0 a 3, lleis de caláu pindies, otres perxudiciales pal desenvolvimientu sostenible, aprobaes pol PSOE col sofitu de la derecha, o l'atayada reforma del Estatutu y la oficialidá, formen parte del balance de la llexislatura qu'agora acaba y que, empezando coles mires de llograr un cambéu de dómina, terminó como un intentu fallíu. Siquier, ese ye'l resume pa Izquierda Xunida, bien crítica con dellos aspeutos d'estos postreros cuatro años de Gobiernu d'Asturies nos que, eso sí, la vocera parlamentaria d'IX, Ángela Vallina, reconoció les dificultaes especiales xeneraes por pandemia de la Covid19 o, depués, polos efectos de la guerra d'Ucrania. Sicasí, más allá de la respuesta a esos retos, hubo, resaltó la parllamentaria, "munches coses que quedaron nel tinteru"

Asina, queda pindia la promesa del presidente, yá nel so discursu de investidura, de faer el 0 a 3 dientro una rede dependiente directamente del Principáu pa nun “carga-y lo” a los Conceyos.

Tamién, ente les temes más complicaes y de mayor impactu negativu, Vallina citó de forma espresa la Llei calidable Ambiental que, al so xuiciu, "nun tenía que salir nesta llexislatura". Y ye que, reprochó, la nueva normativa "ye un despropósitu: nun puede comparase l'apertura d'un chigre que tengas el RAMIMP (Reglamentu d'Actividaes Cafiantes, Insalubres, Nocives y Peligroses) con que te pongan 500 vaques al llau de la to casa ensin namás qu’una declaración (responsable). Eso ye una barbaridá, eso ye rebaxar el control, non la burocracia".

Pa Ángela Vallina, la supuesta llucha del executivu de Barbón frente a la lentitú de l'alministración tuvo por completu errada. "La burocracia teníen qu'empezar a rebaxala onde afecta más a la xente, y non al empresariáu, que ye na Conseyería de Bienestar. Ende ye onde ta la clave, porque son les persones más vulnerables y onde fai más falta empezar a amenorgar la burocracia y nun tar pidiendo tol día los papeles que yá tien la mesma Conseyería. Y eses son les dos pates que pa mi, personalmente, y esto ye una valoración personal, fueron nefastes nesta llexislatura".

L'atayada reforma del Estatutu pa dar cabida a la oficialidá del Asturianu quédase tamién ente les asignatures pindies, en parte porque "un votu" confundió lo que yera un derechu con "pagar otres coses" y, en parte, por una falta d'enfotu del propiu grupu socialista una y bones, cavilgó Vallina, "ellos mesmos tienen esi alderique inda dientro y que por eso nun se punxo l'enfotu que se debería poner nello".

Sía que non, la vocera d'IX amosóse convencida de que yá ye hora de llograr la reforma estatutaria y llevar a la máxima llei asturiana la reconocencia de la oficialidá pa la llingua de la Comunidá.

Al respective de la reforma del Reglamentu de la Cámara, no tocante a les indemnizaciones a los parllamentarios, Vallina defendió la necesidá d'ufiertar a quien mientres un tiempu asume la responsabilidá política, teniendo en cuenta que, tres el cese, los diputaos asturianos nun tienen nengún tipu de prestación. Pa la diputada, negar el desemplegu o dalgún tipu de compensación torgaría que muncha xente pudiera participar na acción política, por culpa de que, cuando se termina, quedaríen "na cai, ensin ingresos". Nesti sentíu, concluyó, "ye una equivocación torgar qu'un obreru o la xente normal de la cai pueda aportar a la política. Namái va poder venir a la política aquel que sía funcionariu, que tenga una plaza fixa a la que volver o-y caltengan el contratu na empresa mientres cuatro años o tenga un bon capital y, a la fin, acabemos faciendo la política pa ricos, que ye lo que, efectivamente, dalgunos pretenden".

Pero amás, negar esi pagu supon, pa Ángela Vallina "defenestrar el trabayu públicu, defenestrar el que se trabaye pa lo público".

Postreru Plenu de Llexislatura

Sanidá, mediu ambiente y atención a les muyeres víctimes de violencia van ser trés de les exes de l'acción parlamentaria d’IX Asturies nel postreru Plenu de l'actual llexislatura. La vocera de la formación, Ángela Vallina, esplicó que nesta sesión, ta previstu llevar, xuntu a Podemos, una Proposición non de Llei pa evitar la crecedera desafranada de los parques eólicos n'Asturies- Tratase d'una iniciativa, al so xuiciu, entá más necesaria dempués de que'l PSOE, sofitáu na derecha, sacara adelantre la Llei calidable Ambiental, una normativa que, según la vocera parlamentaria, supón una desregulación que puede suponer entá más perxuicios pa la redolada, énte la baxada de los controles que trai.

Tamién en materia medioambiental, el diputáu y coordinador xeneral, quier que'l Conseyu de Gobiernu informe sobro les midíes que se tomaron p'amenorgar l'impactu del manexu y atroxu de graneles, especialmente nel puertu d'El Musel, en Xixón, que los sos efectos tienen un altu impactu pa la calidá del aire na ciudá.

Otru de les temes qu'esmolecen a IX ye'l de l'atención a les muyeres víctimes de violencia. Nesti casu, Vallina va pidir al Gobiernu qu'esplique cuándo tien previstu recuperar el serviciu d'atención psicolóxica que se venía emprestando nos conceyos de Valdés, Navia, Coaña y Villayón y que, dende va meses, quedó descubiertu.

Na so última comparecencia como vocera de la Xunta de Voceres, Ángela Vallina estimó a los medios presentes "el tratu y la comunicación: foi un placer".