Menu

El diputáu reconoz “pequenos pasos” pa llograr una inversión na rede básica como la encamentada pola OMS pero cree que ye necesariu un apueste claru y sosteníu pa poner fin al deterioru del sistema

El diputáu y coordinador xeneral d’IX Asturies, Ovidio Zapico, volvió güei a reclamar nel Parlamentu midíes p’asegurar un sistema sanitariu públicu y calidable. Nuna intervención de balance de llexislatura, el parllamentariu recordó qu'Izquierda Xunida apurrió “estabilidá” en tiempos tan difíciles como los de la pandemia, apostando de forma decidida por alcuerdos que dexaron, estos cuatro años, aprobar unos presupuestos indispensables pa dar respuesta a los retos de la crisis sanitaria y, depués, de la guerra. En materia de salú, Zapico resaltó la centralidad na que s'asitió l'atención a les enfermedaes mentales y a la rede d'entrada al sistema xeneral, con un planteamientu pa reforzar l'Atención Primaria.

Asina, esplicó, fuéronse dando “pequenos pasos” p’averar el presupuestu d'Atención Primaria al 25% del gastu total en salú, tal que encamienta la OMS.

Frente al modelu privatizador, aseguró Zapico, ye imprescindible encontiar el sistema públicu y, pa ello, esplicó, ye necesario reconocer los problemes esistentes, de cara a poder resolvelos. “Tenemos una Atención Primaria que nun ta pasando polos sos meyores momentos, que tien un deterioru evidente, bultable”, reprochó, de la que pidió “revolucionar”, con decisiones polítiques, l'Atención Primaria pa llograr un nuevu diseñu que dexe revertir el deterioru, que funde los sos raigaños, enfatizó, nes polítiques de retayos del PP.

Nesi balance, Zapico aseguró que proyectos como'l d'un hospital priváu en Xixón nun ufierten una bona imaxe sobro'l modelu públicu, por culpa de qu’esti tipu d'iniciatives traten de nutrise de la desafección de la ciudadanía a servicios públicos que son los únicos garantes de garantizar una atención ensin distinción por motivos económicos.