Menu

El conseyeru márcase como oxetivos que los usuarios de viviendes públiques lo seyan con arguyu, nun marcu de convivencia y ensin estigmatizaciones

El titular d'Ordenación del Territoriu, Urbanismu, Vivienda y Derechos Ciudadanos refuga que la paralización de los desahucios sía una media “arbitraria”y asegura que nun va haber “acabamientu del patrimoniu públicu”

VIPASA va recuperar el departamentu social, según anunció esta mañana nel Plenu de la Xunta Xeneral del Principáu, el conseyeru d'Ordenación de Territoriu, Urbanismu, Vivienda y Derechos Ciudadanos, Ovidio Zapico, quien esplicó que l'oxetivu ye desenvolver el procedimientu de conciliación y de reforzar los llabores de siguimientu, mediación y ayuda que yá realiza la entidá.

Zapico defendió la necesidá de restablecer esti departamentu énte'l “altu porcentaxe d'inquilinos que son persones vulnerables y que precisen d'esa figura”, y pa facilitar “una comunicación axilosa con otres alministraciones”. Magar nun dio una fecha concreta, el conseyeru adelantró que se va faer de forma inminente”.

A entrugues de los grupos de la oposición, Zapico negó rotundamente que la paralización de los desahucios previstos en Vipasa sía una “midida arbitraria” y sorrayó que, otra manera, afaise a los procedimientos recoyíos na Llei de Vivienda estatal aprobada'l pasáu mes de mayu, “que garantiza la protección xurídica de los inquilinos”.

Nesti sentíu, esplicó que no que se refier a los desahucios, la Llei de Vivienda estatal esixe que los grandes tenedores, como ye'l casu de Vipasa, sometese con calter obligatoriu a un procedimientu de conciliación o intermediación, y contempla amás como requisitos p'aumentar la protección d'estos inquilinos, que se trate de la so vivienda habitual y que sían persones en riesgu de vulnerabilidá.

Con arguyu, ensin estigma y nun marcu de convivencia
El conseyeru aseguró que la decisión nun va suponer l'acabamientu del patrimoniu públicu” y apeló a que morar nuna vivienda pública “nun suponga un estigma, facer con arguyu y nun marcu de convivencia”.

Zapico llamentó que dellos grupos, en referencia a la estrema derecha, “asítiense fuera de la Constitución” y añedió nesti sentíu que la Carta Magna, establez nel so artículu 47 que “tolos españoles tienen derechu a esfrutar d'una vivienda digno y fayadizo y atribúi a los poderes públicos la obligación de promover les condiciones necesaries y establecer les normes pertinentes pa faer efectivu esti derechu”. “Y nós vamos trabayar pa cumplilo”, sentenció.