Menu

El coordinador xeneral d'IX conderga los actos violentos, solidarizase cola militancia del PSOE y llama a la derecha democrática a desmarcase d'una conflictividá cola que pretende llograse lo que nun consiguió colos votos

L'alcuerdu alcanzáu ente PSOE y Junts estena'l camín pa configurar un nuevu gobiernu d'unidá progresista que dexe salir de l'actual situación d'interinidá. Una bona noticia, a xuiciu del coordinador xeneral d'IX Asturies y cabeza de llista de Convocatoria Por Asturies, Ovidio Zapico, que va dexar siguir, mientres otros cuatro años, con midíes reformistes. "El camín escontra la investidura paez que yá s'estena definitivamente y creemos qu'eso ye daqué bono, el poder salir yá d'esa situación d'interinidá ye bien importante pal nuesu país; el poder dexar de tener yá, en curtiu, un Gobiernu en funciones y pasar a tener yá un Gobiernu legitimado pol Congresu de los Diputaos, qu'empiece a desenvolver la so xera ye daqué bien importante pal conxuntu de la población española y ye daqué, tamién bien importante, y non podemos escaecer, p'Asturies".

Al respective de la conflictividá rexistrada nes cais, Zapico aseguró que tien poco que ver col conflictu aparente, respondiendo, en realidá, al mal perder de les dereches.,"L'alcuerdu y tolo que tien que ver cola amnistía nun ye tanto un problema, sinón una sida de los sectores más reaccionarios d'esti país y pola que se dexó tamién tentar el PP pa buscar, por aciu los gallaríos, lo que nun consiguen por aciu'l votu de los nuesos representantes, de los nuesos lexítimos representantes nel Congresu de los Diputaos".

El coordinador xeneral d'IX fizo un llamamientu a la responsabilidá a la derecha democrática que, aprofió, esiste n'Asturies, n'España y que ye bien "numberosa" y "importante". Asina pidió que se desmarque con claridá y rotundidá d'unos sucesos que, sobremanera en Madrid, adquirieron especial roxura. Y ye qu'esos fregaos, aseguró Zapico, "nun son más que sides pa treslladanos mensaxes xenófobos, mensaxes racistes, mensaxes homófobos, mensaxes que cuestionen la mesma Constitución y la mesma democracia y fálennos más bien d'un país en blancu y negru del que la inmensa mayoría de la ciudadanía yá nun quier saber nada".

Ovidio Zapico condergó los actos violentos frente a les Cases del pueblu y amosó la so solidaridá cola militancia del PSOE y de la FSA. Según el coordinador xeneral de IU Asturies, el derechu de manifestación nun puede amparar acciones empobinaes y empobinaes al "amedrantamiento" insgitado dende la ultraderecha y nos que, en dellos momentos, dexóse tentar" el PP.

Frente a esos grupos violentos, señaló'l dirixente, la ciudadanía española, "que ye sabia, que ye madura yá democráticamente, entiende y acepta tolos alcuerdos que se dean nel marcu de la Constitución, que se dean, polo tanto nel marcu de la normalidá parlamentaria y que va recibir de forma mayoritaria d'acordies esti alcuerdu que güei empieza yá definitivamente a desbloquiar tou este llargu tránsitu".