Menu

La viceconseyera, Beatriz González, presentó la estructura del so departamentu a los secretarios xenerales d'UXT y CCOO pa facer apueste por una “cultura de pactu” que garantice la calidá de los servicios públicos

La viceconseyera de Derechos Ciudadanos, Beatriz González Prieto, anunció esta mañana que va establecer una alianza conxunta colos sindicatos d'UXT y Comisiones Obreres (CCOO) d'Asturies pa poder desenvolver los oxetivos políticos de les cinco direcciones xenerales de l’área que dirixe. “Tanto UXT como CCOO son la representación mayoritaria de la sociedá, y esta alianza ye indispensable pa esta Viceconseyería”, esplicó.

González Prieto fixo estes declaraciones en calteniendo un alcuentru conxuntu colos secretarios xenerales de CCOO y UXT, José Manuel Zapico y Javier Fernández Lanero, respectivamente, pa presentar la estructura del so departamentu. La viceconseyera entiende que poder trabayar “a comuña” colos sindicatos de pactu y alcuerdu” ye “una exa irrenunciable” nes polítiques públiques.

Acompañada de Francisco Fernández, director xeneral de Mocedá; Begoña Collado Villa, directora de Memoria Democrática y de Consumu en funciones; Nuria Rodríguez López, directora de Participación Ciudadana, Tresparencia, Diversidá Sexual y LGTBI; y Juan Ponte, director d'Axenda 2030; Beatriz González quixo apostar por una cultura de pactu” que garantice la calidá de los servicios públicos. 
                                          
Al so xuiciu, cuntar cola collaboración d'estos sindicatos ye “especialmente oportuno” cuando surden conflictos llaborales nel sector públicu, amás d'apurrir “propuestes constructives” que se conviertan nun valor añedíu pa l'Alministración del Principáu. Nesti sentíu, citó exemplos completos d'iniciatives que tien previsto poner en marcha la Viceconseyería de Derechos Ciudadanos como'l futuru Plan Estratéxicu de Mocedá, el desenvolvimientu de la Llei de Memoria Democrática d'Asturies, la execución de los Oxetivos de Desenvolvimientu Sostenible (ODS) contemplaos na Axenda 2030 de Naciones Xuníos, según el refuerzu del serviciu de cuidu a les persones consumidores, y l'aprobación de les futures lleis de Participación y LGTBI na nuesa comunidá. 

Pela so parte, José Manuel Zapico (CCOO) indicó que considera que dende esta viceconseyería “va apurrise conocencia y capacidá de trabayu”, y que “la política ye una ferramienta útil p’ameyorar la vida de la xente y avanzar en derechos mientres esta llexislatura”. Javier Fernández Lanero (UXT) tamién quixo faer fincapié na importancia de “construyir polítiques conxuntes” pa dar respuesta a sectores de la sociedá especialmente desfavorecíos, como la mocedá.