Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

08/02/2024

Nuria Rodríguez perfila la inclusión de protocolos educativos na futura llei LGTBI asturiana

Casi una decena d'asociaciones y sindicatos participen na tercer xunta del grupu de trabayu que va ellaborar la normativa autonómica que'l so borrador, según la directora de Diversidá Sexual, podría tar llistu a finales de 2024

La Dirección Xeneral de Participación Ciudadana, Tresparencia, Diversidá Sexual y LGTBI aprovechó la celebración de la tercer xunta del grupu de trabayu que se va encargar de redactar el borrador de la futura Llei LGTBI autonómica pa perfilar la inclusión de protocolos educativos na citada normativa, tal que establez la Llei estatal. Tres l'alcuentru, Nuria Rodríguez López, titular d'esta dirección, esplicó qu'esti grupu de trabayu siguió güei el llabor establecíu na anterior xunta, relativa a la temática educativa. En concretu, nesta ocasión los colectivos encetaron la definición de qué tipu de protocolos ye necesario establecer y de qué manera implementalos pa garantizar los derechos del alumnáu LGTBI nel ámbitu educativu.

La directora tamién indicó que, con esta tercer sesión, el grupu da per rematáu l'abordaxe d'esta materia dientro de la futura llei LGTBI autonómica pa dar pasu, na siguiente xunta, a los aspeutos rellacionaos cola salú que dexen avanzar na defensa de los derechos y llibertaes de les persones lesbianes, gais, transexuales, bisexuales ya intersexuales. Nuria Rodríguez López tamién incidió en que'l desenvolvimientu d'estos alcuentros progresa "a bon ritmu", polo que confía en poder cumplir col oxetivu marcáu al entamu d'esta llexislatura de tener llistu'l borrador a finales d'anguaño en 2024.

Esti grupu de trabayu ta formáu por casi una decena de colectivos coles mires de garantizar que'l Principáu d'Asturies disponga d'una llei consensuada. En concretu, esti grupu constitúyenlu miembros de Xega y Xega Families, Llar Trans, Colibrís n'Acción, la Rede Educativa de Sofitu LGTBI+ d'Asturies, Faciendo Camín, Xuntes y Diverses, y los sindicatos Comisiones Obreres y UXT.

Esta tercer xunta llega dempués de que'l pasáu 23 de xineru celebrara'l primer alcuentru, cita que sirvió pa empezar l'alderique sobro cómo frenar l'acoso que sufre'l colectivu na educación. La intención ye crear dende cero la futura norma, con base na Llei pa la Igualdá Real y Efectivo de les Persones Trans y pa la Garantía de los Derechos LGTBI, aprobada en febreru pol Gobiernu d'España.

Asturies ye na actualidá, xuntu con Castiella y Llión, la única comunidá española qu'escarez d'una llei específica que defenda los derechos y llibertaes del colectivu LGTBI.

Volver

Compartir

2014 Izquierda Xunida d'Asturies - Política de privacidad - Política de cookies