Menu

El coordinador xeneral d'IX llama a que dambos executivos tenga la "mesma música" y midíes pa garantizar, "con Mittal o ensin Mittal" la siderurxa

El coordinador autonómicu d'IX y conseyeru Ordenación de Territoriu, Urbanismu, Vivienda y Derechos Ciudadanos, Ovidio Zapico, llamó güei a los Gobiernos d'Asturies y España a ameyorar les sos relaciones y a coordinar esfuerzos pa dar respuestes a les necesidaes de la Comunidá Autónoma. Dambos executivos, reclamó'l dirixente, deben, "si nun tener la mesma lletra, sí tener la mesma música, qu'hai qu'ameyorar esa sintonía, yo creo qu'eso ye importante". Y ye que, nestos últimos díes, esos desaxustes pudieron vese en cuestiones como les conexones y cronogrames pa l'alta velocidá y, sobremanera, "nel futuru de la siderurxa, que ye daqué que vos esmolez muchísmo"

Nesi sentíu, plantegó al Gobiernu Central que mire, "con más ciñu" los problemes d'Asturies, más teniendo en cuenta que dambos executivos conformen una alternativa d'unidá progresista. "Somos dos gobiernos que tenemos un sustrato ideolóxicu, políticu y social bien similar". 

Tocantes a la industria, Ovidio Zapico aportunó en qu'Izquierda Xunida nun entiende nengún otru futuru que nun contemple la continuidá de la industria y, especialmente, de la siderurxa n'Asturies, que supon un 12% del Productu Interior Brutu (PIB) y que, alvirtió. "nun puede ponese en riesgu". Pa ello, añedió'l coordinador xeneral d’IX Asturies, ye necesario dar impulsu a tou tipu de midíes, ente elles, la reforma lexislativa que, recordó, ta pendiente de que'l Congresu encete esta cuestión. "Tenemos nes Cortes, yá dende la llexislatura anterior una iniciativa del Parlamentu d'Asturies pa declarar estratéxica la industria ellectrointensiva. Yo creo que ye un bon momentu pa recuperar esa iniciativa, por que dambos Gobiernos planteguemos y planteguemos a los nuesos respectivos grupos parlamentarios la necesidá de qu'esa iniciativa sía yá aldericada y  sía yá aprobada".

Más allá de les reticencies d'otros grupos, Ovidio Zapico defendió que'l sector siderúrxicu y Arcelor tienen de siguir como un elementu clave de la economía granible asturiana. "Con Mittal o ensin Mittal tien que siguir habiendo industria siderúrxico n'Asturies". Pa IX, enfatizó, tien qu'asegurase esi futuru: "puede haber un elencu d'opciones enriba de la mesa; qu'esa llei (en referencia a la iniciativa d'IX sofitada pola Xunta y anguaño nel Congresu pa declarar sector estratéxicu a les electrointensives) puédenos, tamién, abrir el camín pa dalguna d'eses opciones, pero lo qu'hai que garantizar, ensin nengún xéneru de duldes, ye'l futuru de la siderurxa. Y nun hai que refugar nenguna de les posibilidaes que pueda haber enriba de la mesa. Nenguna".