Menu

El coordinador xeneral d’IX Asturies y conseyeru d'Ordenación de Territoriu, Urbanismu, Vivienda y Derechos Ciudadanos llanza un mensaxe de tranquilidá a los vecinos afectaos pol desenvolvimientu d'eólicos a quien tresllada qu'el departamente va ser "escrupulosamente garantista, pa defender a les persones y nun pa defender intereses de les compañíes eléctriques”

El coordinador xeneral d'IX y conseyeru  d'Ordenación de Territoriu, Urbanismu, Vivienda y Derechos Ciudadanos, Ovidio Zapico, calificó esta mañana de “políticamente necesarios y oportunos” los allegamientos presentaos pola Conseyería de Mediu Rural y Política Agraria al Real Decretu del Gobiernu central que regula la producción d'enerxía eléctrica n'instalaciones allugaes nel mar. Nesti sentíu, aseguró que yera “lo falao” nel senu del Gobiernu y amosó el so respaldu atayante al sector pesqueru asturianu.

Zapico fixo estes declaraciones en calteniendo una xunta con representantes de la Plataforma pola Defensa de la Redolada del Picu Cubel, de Pravia, pa tratar sobro la instalación d'un parque eólicu nesta zona.

El coordinador xeneral d'IX asitióse de manera inequívoca al pie de pescadores asturianos porque, aseguró, ye un sector estratéxicu, vital na nuesa economía; una flota con un modelu artesanu y sostenible qu'amás de xenerar puestos de trabayu y vida nel nuesu mediu rural, garantiza la nuesa soberanía alimentaria”. Por ello, añedió, el deber del Gobiernu del Principáu ye “caltener esi sector y evitar tou aquello que lo ponga en riesgu”.

Al respective de el cambéu de les directrices sectoriales de la enerxía eólica, el conseyeru aseguró qu'el so departamentu ta trabayando “pa defender l'interés xeneral y llograr los equilibrios necesarios en redol a lo que tien de ser el desenvolvimientu de les enerxíes anovables”.

Sía que non, quixo esclariar que la so posición nun entra en choque col aprovechamientu de les enerxíes medioambientalmente sostenibles, sinón que lo qu'abogen ye por llograr que so esplegue sía respetuosu col territoriu. “Nun tamos en contra de les anovables nin de la so estensión, pero sí a favor d'una planificación y una ordenación al respeutu”.

Zapico indicó que l'actualización d'estes directrices “va llevar unos cuantos meses”, pero sorrayó que les declaraciones al respeutu del propiu presidente del Gobiernu autonómicu, Adrián Barbón, nun Plenu recién de la Xunta Xeneral del Principáu, y que coinciden colo espresao por él mesmu en Comisión, “garanticen que nun va haber nengún problema pa sacar eses directrices adelantre”.

“Quiero llanzar un mensaxe de tranquilidá a tolos vecinos, especialmente los del Occidente, esmolecíos pola allocada estensión de los eólicos, que n'Asturies sí va haber una planificación y sí se va velar polos sos intereses”, aportunó'l conseyeru.

Parque eólicu na redolada del Picu Cubel

Respectu al desenvolvimientu d'un parque eólicu nel Picu Cubel, Zapico esplicó que la Plataforma amosóse esmolecida pola cercanía de los molinos a les sos viviendes y que él treslladó-yos que na tramitación d'esti proyectu, entá bien incipiente, la Conseyería va ser “escrupulosamente garantista”.

“Nesta Conseyería tamos pa defender a les persones y nun pa defender los intereses de les compañíes”, sentenció'l conseyeru.