Menu

Jesús Iglesias, Coordinador Xeneral d'IX d'Asturies, emplaza a los socialistes d'Asturies a recuperar l'impuestu de patrimoniu, sofitando a la Ministra Salgado.

IX caltúvose, en solitariu y dende un primer momentu, calteniendo la necesidá d'esti impuestu que solo grava a los más ricos. Iglesias recuerda qu'al traviés del impuestu de patrimoniu n'Asturies podríen recaldase más de 42,5 millones d'euros, cuantía que supera en demasía el dineru destináu l'añu pasáu al xornal social n'Asturies, 28 millones d'euros, que benefició a 17.000 families.

Iglesias cree que ye'l momentu de plantegar que'l Gobiernu de Zapateru rectifique. “Sería tan fácil como faer un cambiu de los tipos del impuestu, una y bones nun ta suprimíu sinón que se baxó a cero. Tamos nun momentu de crisis bien importante y lo lóxico ye que los que más tienen arimen el costazu”, asegura'l Coordinador Xeneral d'IX d'Asturies. Per otru llau, Jesús Iglesias se congratula de que Zapatero escuche a la cai y a los sindicatos y rectifique la so intención de decretar un Pensionazu. Esta rectificación demuestra que nun esistía nin esiste'l riesgu de que'l sistema de pensiones quebre, según Iglesias.

El Coordinador Xeneral d'IX d'Asturies califica como un “auténticu escándalu” que'l Ministru Corbacho apaeza agora como responsable de márquetin de los planes quitaos de pensiones, que como ye sabío sufrieron en mayor grau los vaivenes de la crisis de la que quedaron al marxe los planes públicos. “Los planes de pensiones privaos suponen un riesgu bien superior a los planes públicos y namás garanticen beneficios a los bancos que les xestionen”, conclúi Iglesias