Menu

Alejandro Suárez, Coordinador d'IX d'Uviéu, afirma que'l Gabinismu quitóse definitivamente la careta con respectu al Palaciu de Xusticia en rueda de prensa y ensin arrebolase.

Al PP y al Conceyal d'Urbanismu del Conceyu d'Uviéu, Alberto Mortera, lo único que realmente-yos interesa de la construcción d'un Palaciu de Xusticia na parcela del Vascu son los intereses económicos d'una empresa, Xovellanos XXI. Alberto Mortera despinta qu'esti alcuerdu supón un timu, pero pa los ciudadanos d'Uviéu, polos escandalosos beneficios a costa del dineru de toos y saltándose los principios más básicos de llibre concurrencia, pa la empresa de cabecera de Gabino de Lorenzo. “Los únicos intereses que xunen al Gobiernu del Principáu, al grupu municipal socialista y al PP d'Uviéu son los de la empresa Xovellanos XXI”, asegura Suárez.

Pal Coordinador d'IX d'Uviéu, Alejandro Suárez, resulta relevante que'l PP reconoza públicamente les sos duldes sobro la llegalidá de la operación promovida por Gabino de Lorenzo y tea acordies con IX-Los Verdes, en que “de normal estes coses fáense por concursu”. Por si nun fuera poco reconoz que la operación supon un importante sobrecostu. Suárez recuerda que “según el proyectu básicu, la construcción del edifico costaría 90 millones d'€ y, sicasí, l'Alcuerdu d'arrendamientu robláu ente Principáu y Xovellanos XXI álzalo a 190 millones d'€ a pagar en 30 años.”

Estes declaraciones del Partíu Popular, más les esmoliciones que provocaron nos servicios xurídicos del gobiernu del Principáu los fundamentos xurídicos de la denuncia presentada por IX-Los Verdes énte la Secretaría Xeneral de Mercáu Interior y Servicios de la Comisión Europea, con fecha de 27 de xunetu de 2009, reafítanos na nuesa esixencia al Gobiernu del Principáu d'Asturies d'abandonar esti proyectu y recuperar la construcción de la llamada Ciudá de la Xusticia nos terrenos d'El Cristo, qu'en pocos meses van quedar llibres cola inaguración del nuevu HUCA.

La Secretaría Xeneral de Mercáu Interior y Servicios de la Comisión Europea yá pidió al Gobiernu d'Asturies y al d'España información pa decidir sobro la llegalidá del alcuerdu suscritu pela parte socialista del Gobiernu asturianu y l'empresa Xovellanos XXI.

Al respective d'El Cristo, Suárez considera que nun se pue abandonar a la so suerte la zona alta de la ciudá tres el treslláu del hospital al nuevu HUCA. Y sería menos entendible teniendo una alternativa pa caltener l'actividá y la población d'El Cristo onde va dellos años como ye'l proyectu de “la ciudá de la xusticia” económicamente vidable y que nun presenta nengún problema llegal, al construyise en terrenos del Principáu.”