Menu

El xuiciu abiertu por coacciones, tres la demanda de Francisco de Asís Fernández, nel Tribunal Superior de Xusticia d'Asturies contra Jesús Iglesias, Noemí Martín, Luis Álvarez y Alfonso Suárez, quedó vistu pa sentencia esta mañana. El fiscal del TSXA, Gerardo Herrero, pide la llibre absolución pa los cuatro dirixentes d'IX d'Asturies.

El Ministeriu Fiscal considera que los fechos asocedíos en mayu de 2007  nun son constitutivos de delitu. Gerardo Herrero, nes sos conclusiones, espresó que nun hai prueba dalguna pa imputar un delitu de coacciones, máxime cuando'l PCE dexó inerme l'acusación al llegar a un alcuerdu con IX para, según les sos palabres “terminar con una guerra fraticida”. Herrero considera probáu que nos díes previos a les eleiciones, “díes de nervios, nueches, llargues y barullos de despachu”, lo único que pretende IX ye faer usu del local o, siquier, que nun se-y torgar faer usu del mesmu como lo venía faciendo antes del primer cambéu de peslleres que realizó'l PCA de Francisco de Asís Fernández. L'actuación d'IX foi, según el Fiscal del TSXA, una actuación en virtú d'un contratu qu'esiste y al qu'hai que da-y veracidad.

Pela so parte, Ana García Boto, abogada defensora de Noemí Martín, Jesús Iglesias y Luis Álvarez  sirvióse de la declaración  d'una alministrativa que trabayaba na see d'IX pa ilustrar la tensión que provocara la ocupación que llevara a cabu'l PCA y que nun hubo per parte de la coalición nin amenaces nin coacciones.

Ello ye que esta alministrativa declaró que los militantes del PCA ocuparon el so despachu, que nun-yos dexaben trabayar y que se vieron obligaos a colase a otru local unos díes antes de les eleiciones porque-yos dieron de baxa'l teléfonu, fax ya internet. Para Boto, l'autoría nun ta acreditada, porque la decisión de camudar la pesllera adoptóse por un órganu colexáu d'IX, y, sía que non, nun hai llugar a un delitu de coacción porque se fixo de forma pacífica y  na so condición de renteros.

N'afirmando qu'esos díes el PCA “paecíase más al camarote de los hermanos Max qu'a una organización política”, Boto aseguró que fueron los militantes d'IX los  que sí vivieron una coacción previa per  parte d'esti partíu y que namá se pretendió “de forma acertada o non, pero nunca delictiva” faer valir los sos derechos ensin tratar de torgar l'usu compartíu de la see.

Sergio Herrero, abogáu d'Alfonso Suárez, que tamién pidió l'absolución, resaltó una frase de Francisco de Asís Fernández pronunciada mientres la so declaración que revela l'aniciu y el porqué d'esti asuntu: “decidimos dar en tómala de posesión del local”, afirmó'l Secretariu Xeneral del PCA. Herrero recordó qu'esta situación producióse a cuatro díes arteros pa les eleiciones, nos qu'IX tuvo que realizar de forma entainada un cambéu de llugar físicu de trabayu, utilizando un local, que nun yera tal como dixo De Asís Fernández pa buscar una estética xuvenil, sinón motiváu pola ocupación de plaza d'América polos militantes del Partíu Comunista.

Herrero describió cuatro fases: la primera d'elles, que definió como status quo producióse hasta'l 21 de mayu, na qu'en Plaza d'América había dos fuerces polítiques, “cuando non una” qu'ocupaben pacificamente el local, pol qu'IX pagaba 2.400 euros de renta al mes y toleraba la presencia del PCA, al traviés d'un contratu d'arrendamientu. Esta situación empieza a alteriase en marzu y abril con enfrentamientos internos frutu del Congresu del Partíu qu'unos reconocía y otros non, con intercambios de burofasex y requerimientos.... La tercer fase produzse, como describe Francisco de Asís Fernández, cuando'l PCA “decide dar en tómala de posesión” del local el día 29 de mayu. La cuarta fase produzse a partir del 29 de mayu y una vegada que se produxeren les eleiciones, cuando IX intenta recuperar la posesión del local del que yeren arrendatarios, dando en poner un control d'accesu, una facultá lexítima del posesor del local, con unos vixilantes que cumplíen col so llabor. Esta última frase producióse dempués de les eleiciones pa evitar el “escándalu” antes de les eleiciones pa un partíu que s'atopaba en plena campaña autonómica y municipal.

L'abogada de l'acusación particular, Ana Taboada, aseguró que les declaraciones de los militantes del PCA y de los vixilantes que testificaron nestos dos díes nun dexen llugar a dulda de que "hubo coacciones" per parte de la dirección de la coalición.L'acusación particular pide dos años de prisión pa caúnu de los dirixentes d'IX d'Asturies.