Menu

Los axudicatarios van ocupar les viviendes nel mes de setiembre. L'arriendu mensual d'estes viviendes bazcuya ente los 140 y los 450 euros y los inquilinos van poder solicitar amás ayudes al arriendu.

La xerente de la empresa pública Viviendes del Principáu d'Asturies (VIPASA), Marta Pulgar, presidió esti mediudía, nel Salón d'Actos del Edificiu de Servicios Múltiples (EASMU), el sortéu de les 106 viviendes adquiríes a promotores privaos pa destinales a arriendu protexíu. Nesti sortéu participaron 122 persones de les 205 que presentaron con un total de 279 solicitúes, cuidao que podíen presentase hasta trés per persona.

Les viviendes distribúyense ente los conceyos de Siero (14), Uviéu (14), Llangréu (4), San Martín del Rey Aurelio (9), Llaviana (52), Cuideiru (8) y A Veiga (5).

Marta Pulgar destacó que “con esti sortéu completamos una iniciativa pionera n'Asturies como foi l'alquisición de viviendes llibres yá construyíes a promotores privaos pa destinar a arriendu protexíu. Esta fórmula dexónos amontar el parque públicu d'arriendu, con una tipoloxía de vivienda destinada a persones con ingresos d'ente 0,8 y 2,5 vegaes IPREM”.

El sortéu realizóse por promociones, siguiendo l'orde de publicación nel BOPA, y, en función de les solicitúes recibíes, estableciéronse hasta cuatro cupo:

Cupió 1: Empadronaos nel conceyu con más de 2 años d'antigüedá o contratu indefiníu nel conceyu.

Cupió 2: Empadronaos nel conceyu con menos de 2 años d'antigüedá.

Cupió 3: Empadronaos en conceyos colindantes.

Cupió 4: Empadronaos n'otros conceyos.

En cada promoción sorteáronse en primer llugar les solicitúes enmarcaes nel cupu 1 y siguientes hasta completar el total de viviendes y ordenar la llisa de reserva.

Les llistes provisionales d'axudicatarios y reserves podrán consultase a partir de mañana na páxina web de VIPASA, www.vipasa.info y los inquilinos van ocupar les viviendes nel mes de setiembre. A les persones que salieron agraciaes en delles promociones va axudicáse-yos la vivienda na promoción escoyida como primer opción y esta axudicación va faese efectiva cola firma del contratu d'arriendu.

Marta Pulgar recordó que “estes viviendes nun son viviendes de Promoción Pública, son viviendes de Promoción Autonómica (VPA) n'arriendu protexíu y el so arriendu bazcuya ente los 140 y los 450 euros”. Esti importe vien determináu polos metro cuadraos de la vivienda y de si cunta con plaza de garaxe y trasteru venceyaos.

Los axudicatarios de les viviendes van poder solicitar les ayudes al arriendu que xestiona la conseyería de Bienestar Social y Vivienda y que suponen ente'l 40 y el 60% de la renta mensual. Los mozos d'ente 22 y 30 años tamién pueden aportar a los 210 euros d'ayuda de la Renta Básica d'Emancipación que concede'l Ministeriu.

Esti tipu de vivienda protexida nun ta regulada pol Decretu 30/2003 que namá regula l'Axudicación de Viviendes de Promoción Pública (VPP) nes que l'arriendu de los inquilinos nun supera'l 20% de los sos ingresos y establécense cupos pal sortéu en función de les necesidaes detectaes pol Conceyu que dexa'l suelu.

La compra de viviendes llibres en stock, promovida por VIPASA y enmarcada nel Plan de Vivienda 2009-2012 del Ministeriu de Vivienda, ye una de les iniciatives desenvueltes dende la conseyería de Bienestar Social y Vivienda pa poner n'arriendu más vivienda a precios algamadizos. Esta operación supunxo una inversión total de más de nueve millones d'euros y cuenta con una subvención del Ministeriu de Vivienda de casi tres millones d'euros.

Dende la empresa pública VIPASA unvióse una carta a toos los Alcaldes de los Conceyos nos que s'alluguen estes viviendes pa convida-yos al sortéu y estima-yos la so collaboración nel procesu.