Menu

Esta decisión de la Comisión Europea d'acabar coles ayudes a les empreses extractivas de carbón non rentable y prorrogales hasta 2014 como - inasumible ya inaceptable -

El grupu parlamentariu d'IX-BA-Verdes na Xunta Xeneral presentó una Proposición Non de Llei na qu'encamienta al Gobiernu del Principáu a dirixise al Gobiernu de la nación esixendo que defenda nel senu de la Unión Europea la ellaboración d'un réxime estable d'ayudes a la producción de carbón que garantice'l caltenimientu de l'actividá extractiva nel nuesu país. Jesús Iglesias, voceru del grupu parlamentariu y Coordinador Xeneral d'IX d'Asturies, considera esta decisión de la Comisión Europea d'acabar coles ayudes a les empreses extractivas de carbón non rentable y prorrogales hasta 2014 como “inasumible ya inaceptable”.

Jesús Iglesias espera que la Xunta Xeneral apruebe esta Proposición Non de Llei nel próximu periodu de sesiones y adelantra qu'IX va defender con firmeza iniciatives nos conceyos, nel parlamentu español y al traviés del grupu parlamentariu européu, empobinaes, toes elles al caltenimientu de l'actividá extractiva nel sector del carbón, calificáu d'estratéxicu hasta'l momentu.

El Coordinador Xeneral d'IX sorraya que'l sector enerxéticu foi oxetu d'una falsa lliberalización n'España que dio llugar al caltenimientu d'una situación de oligopolio nel que les grandes compañíes pártense'l mercáu y afiten precios, cuntando amás con ensame de subvenciones con cargu a recursos públicos que nun significaron beneficiu dalgunu pa el consumidores. Nesta situación, añede Jesús Iglesias, resulta un sarcasmu que dende la Comisión Europea pretenda faese sumir el réxime d'ayudes a la producción del carbón en 2014 y llindando el caltenimientu de les mesmes hasta tala fecha cola esixencia de qu'esista un compromisu de zarru de les esplotaciones non rentables. IX entiende que detrás d'esta decisión ta l'alcuerdu alcanzáu ente PP y PSOE nel sector enerxéticu que busca favorecer la enerxía nuclear, que recordemos, ye la más subvencionada directa ya indirectamente nesti país.

“Como ye sabíu, ye carbón ye una de les poques garantíes d'un ciertu grau de suministru enerxéticu autónomu y hasta agora fuéra-y reconocíu'l calter estratéxicu”, recuerda Iglesias. Coles mesmes alvierte daqué “obviu” que de salir alantre la pretensión de la Comisión Europea taría condergándose al zarru a la empresa pública Hunosa.