Menu

Considérase inaceptable'l copagu en sanidá y educación

Pa Jesús Iglesias, Coordinador d'IX d'Asturies “el Conseyu de Política Fiscal y Financiera sigue encegoláu con amenorgar el déficit públicu pela vía de retayar el gastu arrenunciando a amontar los capítulos d'ingresos pente medies de un sistema fiscal xustu y progresivu”

Pa IX d'Asturies ye inxustu que l'amenorgamientu del techu del déficit públicu hasta'l 1,3% pa 2011 y 2012 y el 1,1% pa 2013 esíxase a toles CCAA por igual, ensin tomar en considerancia los esfuerzos realizaos n'años anteriores pa caltener la solvencia y el grau y nivel de les sos infraestructures de comunicaciones y servicios públicos.

Con esti panorama “namá onde IX tien un pesu políticu relevante púdose utilizar la capacidá de decisión que tienen les Comunidaes Autónomes en materia fiscal pa llograr que paguen más los que más tienen. Nel restu de CCAA optóse por proxectar la estratexa del gobiernu de Zapatero de jibarización del Estáu de Bienestar”, afirmó Iglesias.

El Coordinador d'IX d'Asturies recordó que sigue pendiente la tantes vegaes anunciada decisión del gobiernu de la Nación de tomar midíes nel ámbitu fiscal esistiendo, amás, una absoluta inacción na llucha contra'l fraude. Nesti sentíu, pa Jesús Iglesias “ye bien significativa la recién decisión de la Vicepresidenta Elena Salgado d'imponer al grupu Socialista qu'arrenunciara a ampliar a 10 años el plazu de prescripción de los delitos fiscales na reforma del Códigu Penal.”

IX considera igualmente inaceptable la pretensión de delles CCAA de contribuyir al amenorgamientu del déficit pente medies de la introducción del copago na sanidá y na educación. Una vegada más hai qu'aportunar en que la respuesta nun ta nel copago sinón n'impuestos más altos pa les rentes más elevaes.