Menu

Los candidatos d'IX d'Asturies al Congresu y el Senáu, Gaspar Llamazares y Esther García, respectivamente, comprometiéronse esta mañana cola Presidenta de l'Academia de la Llingua, Ana Cano, a impulsar que salga alantre la reconocencia de la especialidá docente de Llingua Asturiana, decisión que n'última instancia depende del Gobiernu central.

El candidatu d'IX al Congresu recordó que los profesores atopense nuna situación d'interinidá por que'l Ministeriu nun reconoció nel catálogu d'especialidaes la d'asturianu. A xuiciu de Llamazares esta situación ta produciendo una discriminación frente a los d'otres especialidaes, yá que viven en situación d'interinidá mientres nun se convoquen oposiciones. De la mesma, recordó que se trata d'una reivindicación xusta y de sentíu común” yá que n'Asturies yá esiste la especialidá na Universidá, con un minor y un master. Esti puntu esta recoyíu nel programa col qu'IX d'Asturies va allegar a les elecciones del 20-N.
Asina, Ana Cano señaló, na so xunta con IX que, magar que la política llingüística correspuende al Gobiernu autonómicu, hai cuestiones que dependen del Estatal, como ye'l casu de la reconocencia de la especialidá, “que tien una fácil solución al marxe de la oficialidá”.

Pela so parte, Esther García, quien tamién exerció como profesora d'asturianu, recordó que tol profesoráu de llingua ta en precariu . “La formación yá la tenemos”, recordó,la candidata al Senáu, señalando que namái falta la especialidá.
Llamazares tamién se comprometió a primir dende'l grupu políticu d'IX nel congresu por que se modifique l'Estatutu d'Autonomía d'Asturies, cola aprobación de la cooficialidá de la llingua asturiana. Nesti asuntu, reconoció que la reforma estatutaria nun ye una prioridá” pal restu de fuerces polítiques presentes nel parlamentu y que na anterior llexislatura namá IX defendió la cooficialidá na reforma atayada. Amás, señaló que mientres non se consiga la oficialidá, “hai un camín por percorrer col desenvolvimientu de la Llei de Promoción y Usu”.