Menu

El voceru d'IX tresllada les sos condolencias a la familia y reconoz los cambeos d'Asturies

Gaspar Llamazares, voceru parlamentariu d'IX na Xunta Xeneral, reconoció esta mañana na Xunta Xeneral a un políticu de raza” en Vicente Álvarez Areces, ex presidente del Principáu y ex alcalde de Xixón, fináu esta mañana. Llamazares espresó la condolencia a la familia de “un políticu que representa a toa una xeneración dende la Transición: nel movimientu estudiantil en Santiago de Compostela, más tarde con responsabilidaes polítiques nel Partíu Comunista y más tarde en responsabilidaes institucionales al máximu nivel, rematando na presidencia del Principáu.

“Vicente Álvarez Areces foi un políticu coherente coles sos idees que nunca arrenunció a los sos oríxenes, con una capacidá d'iniciativa y de trabayu que toos-y reconocemos y los asturianos reconoceránlu. Nun ye necesario faer un panexíricu pa reconocer el trabayu de “Tini” y reconocer nél a toa una xeneración política que llogró pa esta comunidá y los sos ciudadanos conquistes bien importantes. En tiempos en que floria l'agraviu y la depresión pol futuru, hai que reconocer los cambeos y los cambeos pa bien que debemos a Vicente Álvarez Areces y tolo qu'había en redol a él. Gracies Vicente”, aseguró'l voceru d'IX dempués de la Xunta de Voceros estraordinaria que tuvo llugar esta mañana na Xunta Xeneral.