Menu

Izquierda Xunida pidió güei esplicaciones pa saber qué llevó al Serviciu d'Emerxencies del Principáu d'Asturies (SEPA) a refugar solicitúes de permisos al so personal p’atender situaciones familiares bien graves.

La formación, al traviés de la so vocera parlamentaria, Ángela Vallina, rexistró güei mesmo un pidimientu de comparecencia de la Conseyera de Presidencia y del Xerente del SEPA énte la comisión parlamentaria correspondiente coles mires de qu’ufierten tola información relativa a estos casos, denunciaos nes últimes hores por trabayadores del serviciu, y tamién pa conocer qué medies adoptáronse pa reparar el dañu y dupurar les responsabilidaes a les que haber dáu llugar.

Al pie de esti pidimientu de comparecencia, y énte la gravedá de la situación, IX tamién presentó la siguiente batería d'entrugues pa la so contestación por escritu per parte del Conseyu de Gobiernu:

¿Tien el Conseyu de Gobirnu conocencia del incidente que se produció nel Serviciu de Emerexencies del Principáu d'Asturies (SEPA) al refugase a dalgún miembru del personal de bomberos permisos llaborales a los que tenía derechu pa visitar a familiares directos que taben ingresaos y afectaos de manera crítica pol COVID-19? ¿Considera que ye aceptable que, habiendo capacidá pa sustituyilos, puean refugase los permisos legalmente establecíos a profesionales que tán sufriendo situaciones tan dolioses? ¿Ye compatible esta actitú de falta de respetu institucional col efectu afecto amosáu pola ciudadanía al personal de los servicios esenciales nestes selmanes? ¿Tien previstu'l Gobiernu tomar les midíes necesaries pa depurar les responsabilidaes alministratives internes a qu'hubiera llugar de resultes d'estos fechos?